چاڤکانیەک سیاسی ژ بۆ مەدیایا عەرەبی گۆت کو ئامەریکایێ ئالیێ ئیراقی ژ بریارا ڤەکشاندنا تەڤاهی یا ھەمی لەشکەرێن خوە ژ ئیراقێ ئاگاھدار کریە، ب ڤی رەنگی ژ بەرنامەیا کو بەرێ د ناڤبەرا بەغدا و واشنگتۆنێ دە ژ بۆ کێمکرنا ھێزێن لەشکەری ل ھەڤ کربوون دەرباس بوویە. پسپۆرەکی سیاسەتا ئامەریکایێ دبێژە کو ھەکە پارلامەنتۆیا ئیراقێ یاسایا حەشدا شەعبی ب پەژرینە، ڤەبژارکا سزایێن ئابۆری و ئێریشێن ل سەر ئەنیا بەرخوەدانێ ل سەر مێزەیێ سەرۆکێ ئامەریکایێ دۆنالد ترامپە.
ل گۆر زانیاریێن سکای نیوز عەرەبی یا ژ چاڤکانیەکی ڤەگوھەستیە، واشنگتۆنێ بریار دایە کو ب ئاوایەکی بلەز لەشکەرێن خوە ژ ھەر دو بارەگەھێن لەشکەری یێن عەین ئەسەد و ڤیکتۆریا ڤەکشینە.
بریارە بەشەک ژ ڤان ھێزان دێ ل ھەولێرا پایتەختا حکوومەتا ھەرێما کوردستانێ وەرن بجھکرن و بەشەک ژ وان ژی دێ ل وەلاتەکی جیران یێ عەرەب رە وەرە شاندن.
چاڤکانیان گۆتن کو ئامەریکیان ژ ئیراقیان رە گۆتنە کو پێڤاژۆیا ڤەکشینێ دێ ژ یا کو ھاتیە پلانکرن زووتر بە و ئەو دێ ل گۆری چارچۆڤەیا دەمێ یا کو د پەیمانا ڤەکشینێ دە ھاتیە دەستنیشانکرن تەڤنەگەرن.
ئەڤ پێشکەتن د دەمەکێ دە تێ کو دەولەتێن یەکبوویی یێن ئامەریکایێ ل دژی ئەنجامێن قانوونا حەشدا شەعبی دەردکەڤە.
چاڤدێر باوەر دکن کو گەر ھەگەمۆنیایا حەشدا شەعبی زێدە ببە، ئان ژی بەرژەوەندیێن واشنگتۆنێ بخە مەترسی، دەولەتێن یەکبوویی یێن ئامەریکایێ دبە کو سەری ل سزایێن ئابۆری و پێنگاڤێن لەشکەری بدە.
ھندەک شرۆڤەکار باوەر دکن کو ڤەکشینا ژ نشکا ڤە تەدبیرەک ئەولەھیێ یە ژ بۆ پاراستنا ھێزێن ئامەریکی یێن کو ب گەفێن دۆمدارێن ژ بارەگەھێن لەشکەری یێن ل ئیراقێ، نەمازە ل عەین ئەسەد و ڤیکتۆریایێ رە روو ب روو نە.
