ئارتێشا ئیسرایلێ راگھاند، لەشکەرەکی دن یێ ئیسرایلی ل باشوورێ کەرتا غەززەیێ ھاتیە کوشتن. لگەل ڤێ یەکێ، ھەژمارا گشتی یا لەشکەرێن ئیسرایلی یێن کو ژ 7ێ جۆتمەھا 2023ێ ڤە د شەری دە ھاتنە کوشتن، گھیشت 900 کەسان.
ل گۆری داخویانیا ئارتێشا ئیسرایلێ، ئەفسەرێ ب ناڤێ ئارەل لوبلنێ 34 سالی، کو د لیوایا لۆژیستیکی یا 2036 یا سەر ب فرقەیا 36ێ ڤە کار دکر، د شەرەکی ل باشوورێ کەرتا غەززەیێ دە ژیانا خوە ژ دەست دا. کوشتنا ڤی ئەفسەری رۆژەکێ پشتی کوشتن و برینداربوونا ھەژمارەک لەشکەرێن دن یێن ئیسرایلی ل کەرتا غەززەیێ پێک ھات.
ئامارێن کوشتیێن ئارتێشا ئیسرایلێ
مالپەرا فەرمی و رادیۆیا ئارتێشا ئیسرایلێ ھەژمارا 900 لەشکەرێن کوشتی پشتراست کرن و ئامارێن بەرفرەھ ب ڤی ئاوایی بەلاڤ کرن:
– 329 لەشکەر: د رۆژا 7ێ جۆتمەھێ دە ھاتن کوشتن.
– 456 لەشکەر: د ئۆپەراسیۆنێن بەژایی یێن ل کەرتا غەززەیێ دە ھاتن کوشتن.
– 50 لەشکەر: د ئێریشا ل سەر لبنانێ دە ھاتن کوشتن.
– 34 لەشکەر: د ئێریشێن ل دژی حزبوللاھا لبنانێ دە ھاتن کوشتن.
– 16 لەشکەر: د پەڤچوونێن ل کەنارا رۆژئاڤا دە ھاتن کوشتن.
– 2 لەشکەر: د ئێریشێن ب درۆنان یێن میلیسێن ئیراقی دە ھاتن کوشتن.
– 1 لەشکەر: د ئەنجاما ئێریشێن مووشەکی یێن ئیرانێ دە ھاتە کوشتن.
– 12 لەشکەر: د بوویەر و ئۆپەراسیۆنێن دن یێن جودا دە ھاتن کوشتن.
ئامارا گران یا ل ئالیێ فلستینێ
ژ 7ێ جۆتمەھا 2023ێ ڤە، د ئەنجاما ئێریشێن ھێزێن ئیسرایلێ دە، نێزیکی 63 ھەزار فلستینی ھاتنە کوشتن و نێزیکی 159 ھەزار کەس ژی بریندار بوونە. ھات راگھاندن کو پرانیا قوربانیان زارۆک و ژنن. ھەروھا، زێدەتری 10 ھەزار کەس وندا نە و ب سەد ھەزاران کەس ژی کۆچبەر بوونە.
ل گۆری داتایێن وەزارەتا تەندورستیێ یا غەززەیێ، ژ بەر برچیبوون و کێماسیا خوارنێ ل زیڤالا غەزەیێ، 322 فلستینیان جانێ خوە ژ دەست دانە، کو ژ وان 121 کەس زارۆکن.
