سەرۆککۆمارێ ترکیەیێ رەجەب تەییب ئەردۆگان راگھاند، “پێڤاژۆیا ئاشتیێ” ب خەباتێن کۆمیسیۆنێ گھشتیە قۆناغەکا گرینگ. ئەردۆگان ھەروھا تەکەز کر، حکوومەت و ھەموو ئالی ب بەرپرسیاری تەڤدگەرن و ھشیاری دا کو ھەر ئالیێ ھەول بدە پێڤاژۆیێ تێک بدە، “دێ باجێ بدە”.
ئەردۆگان ئیرۆ 2ێ ئیلۆنێ د داخویانیێن خوەیێن د فرۆکەیێ دە دەما ژ چینێ ڤەدگەریا دیار کر، حکوومەت و ھەموو ئالی دخوازن پرسگرێکا چل سالان بداوی بکن و د ڤێ مژارێ دە بەردەوامن.
ئەردۆگان ھەروھا گۆت: “مە نەخشەرێیا خوە و ئارمانجا خوە ب ئاوایەکی زەلال دانیە. چاڤکانیێن کو ھەتا نھا ژ بۆ شەرێ ل دژی تەرۆرێ ھاتنە خەرجکرن، دێ ژ نھا و پێ دە ژ بۆ بەرھەمانین، گەشەدان، وەبەرھێنان و دەرفەتێن کاری بێنە بکارانین.” ئەردۆگان دەستنیشان کر کو ب سەرکەفتنا پێڤاژۆیێ، دێ ھەموو ترکیە و ناڤچە سوودێ وەربگرن.
ئەردۆگان د بەردەوامیا ئاخافتنا خوە دە پەیاما “براتیێ” دا و وھا ئاخڤی: “کورد ل کو دەرێ بژین برایێن مە نە. کەس نکارە مە ژ ھەڤ جودا بکە. چاوا کو گۆشت و ھەستی ژ ھەڤ ڤەناقەتن، براتیا مە ژی وسایە.”
دەربارێ رەوشا سووریەیێ دە، ئەردۆگان گۆت کو ئەو دخوازن سووریە ب ھەموو پێکھاتەیێن خوەیێن وەکی عەرەب، کورد، عەلەوی و خرستیان د ناڤا یەکیتیێ دە بژی.
ئەردۆگان گۆت، گەلەک ئالی ھەنە دخوازن قەیرانا سووریەیێ بەردەوام بە، لێ ژ بەر ڤێ ئەو ت جارێ سووریەیێ ب تەنێ ناھێلن و ئەوێ وی وەلاتی راکن سەر پێیان.
