سەرۆکێ فرانسایێ ئیمانۆئێل ماکرۆن ئێریشا ئیسرایلێ یا ل سەر پایتەختا قەتەرێ، دەوحەیێ، ب توندی شەرمەزار کر و ئەو ب “نایێ قەبوولکرن” ب ناڤ کر. ماکرۆن ھەروھا ھشیاری دا کو دڤێت شەر ل ھەرێمێ بەلاڤ نەبە.
ئەڤ بەرتەک پشتی وێ یەکێ ھات کو ئارتێشا ئیسرایلێ ئیرۆ 9ی ئیلۆنێ راگھاند، ھێزێن وان، ب ھەڤکاریا سازیا ئەولەھیا ناڤخوەیی (شاباک)، ئێریشەکا ئەسمانی ل دژی بارەگەھەکا حەماسێ ل دەوحەیێ پێک ئانینە. ل گۆری زانیاریێن مەدیایێ، د ئێریشێ دە شاندا دانووستاندنانا حەماسێ ھاتیە ئارمانجکرن، کو ئەڤ یەک بوو سەدەما بەرتەکێن توند یێن ناڤدەولەتی.
سەرۆکێ فرانسایێ ل سەر ھەژمارا خوە یا تۆرا جڤاکی یا “X” نڤیساند: “ئەڤ ئێریشێن ئیسرایلێ ب چ ئاوایی و ب چ ھنجەتێ نایێن قەبوولکرن.” ماکرۆن ھەڤخەمیا خوە ژ بۆ قەتەرێ و شێخ تەمیم ئەل سانی ئانی زمان و تەکەز کر کو “دڤێت د بن چ شەرت و مەرجان دە شەر ل تەڤاھیا ھەرێمێ بەلاڤ نەبە.”
قەتەر: “ئەڤ ئێریشەکاتاوانکاری و بنپێکرنا یاسایێن ناڤدەولەتییە”
ژ ئالیێ خوە ڤە، وەزارەتا دەرڤە یا قەتەرێ ژی داخویانیەک بەلاڤ کر. بەردەڤکێ وەزارەتێ، ماجد ئەل-ئەنساری، راگھاند: “ئەم ب ئاوایێ ھەری توند ئێریشا ئیسرایلێ یا ل دژی بارەگەھێن ئەندامێن سەرکردایەتیا حەماسێ ل دەوحەیێ شەرمەزار دکن.”
وی دەستنیشان کر کو ئەڤ “ئێریشا تاوانکاری” بنپێکرنەکا ئاشکەرا یا ھەموو یاسا و پیڤانێن ناڤدەولەتییە و گەفەکا جدییە ل سەر ئاساییش و ئەولەھیا قەتەریان.
