سەرۆکێ دەمکی یێ سووریەیێ ئەحمەد شەرع، راگھاند، دانووستاندنێن ھێزێن سووریا دەمۆکراتیک (ھەسەدێ) راوەستیانە و راستی ھندەک ئاستەنگیان تێن. ھەروھا تەکەز کر، ھەر ھەولدانەکا ژ بۆ پارچەبوونێ، چ ل سوەیدایێ بە، چ ژی ل ھەرێمێن دن بە، دێ زرارێ بدە یەکپارچەبوونا سووریەیێ و بەرژەوەندیا گەل.
دانووستاندنێن لگەل ھەسەدێ: “ئالیێن ناڤدەولەتی دەستێوەردانێ دکن”
ئەحمەد شەرع د ھەڤپەیڤینەکێ دە لگەل کەنالەکا سووری راگھاند، ھەسەدێ نوونەرتیا ھەموو پێکھاتەیێن ھەرێمێ ناکە و گۆت: “ل باکور و رۆژھلاتێ سووریەیێ، پێکھاتەیا عەرەب ژ سەدی 70ێ یا نفووسێ پێک تینە. ھەسەدە ژی نوونەرتیا ھەموو پێکھاتەیا کورد ناکە کو ئەم بکاربن ببێژین ئەو دەنگێ ھەرێمێیە.”
ھەروھا گۆت: “رەوشا کوردان ل سووریەیێ نە وەکی یا ھەرێما کوردستانێ ل ئیراقێیە.” شەرع دیار کر کو بەرژەوەندیا ھەری باش ژ بۆ گەلێ باکور و رۆژھلاتێ سووریەیێ ئەوە کو لگەل شامێ بن و گۆت: “ئیرۆ دەرفەتەکا زێرین ھەیە کو سووریە برینێن خوە دەرمان بکە و ب رووپەلەک نوو دەست پێ بکە. گاڤەکا بەرەڤاژی ڤێ یەکێ دێ زرارێ بدە خوەدیێن ڤان فکران ب خوە.”
دەربارێ دانووستاندنێن لگەل ھەسەدێ، شەرع ئەشکەرە کر کو پێڤاژۆ راستی ئاستەنگیان تێ و گۆت: “دانووستاندن باش دمەشیان، لێ د جیبجیکرنا لھەڤکرنێ دە ھێدیبوون ھەیە. ئالیێن ناڤدەولەتی یێن وەکی ئامەریکا و ترکیەیێ ژی دەستێوەردانێ دکن.”
ھەروھا شەرع ھندەک بەندێن لھەڤکرنێ ژی ئەشکەرە کرن و گۆت: “مە ل سەر تەڤلیکرنا ھێزێن ھەسەدێ د ناڤ ئارتێشا سووریەیێ دە و ھەروھا ل سەر ھندەک تایبەتمەندیێن ژ بۆ ھەرێمێن کوردی لھەڤ کربوو.”
سوەیدا و مەترسیا پارچەبوونێ
سەرۆکێ دەمکی یێ سووریەیێ ھەروھا بەحسا ئالۆزیێن ل پارێزگەھا سوەیدایێ ژی کر و گۆت کو ھندەک ئالیێن ناڤخوەیی و دەرڤەیی، ب تایبەتی ئیسرایل، ھەول ددن ژ رەوشێ سوود وەربگرن و پرۆژەیێن “خەیالی”یێن پارچەبوونێ پێش بخن.
شەرع تەکەز کر کو سووریە پارچەبوونێ قەبوول ناکە و گۆت: “ئەز لگەل گەلەک کەسایەتێن ژ سوەیدایێ جڤیام و من ژ وان حەزکرن و پابەندبوونەکا مەزن ژ بۆ وەلات دیت.” وی دا زانین کو دەنگێن کو داخوازا جودابوونێ دکن، نە دەنگێ پرانیا گەلێ سوەیدایێ نە.
نەناڤەندیبوون یان یەکپارچەبوون؟
شەرع د بەرسڤا پرسەکا دەربارێ مۆدەلێن نەناڤەندیبوون یان فەدەرالیزمێ دە، ھشیاری دا کو ھەر ھەولدانەکا بەر ب پارچەبوونێ ڤە دێ ببە سەدەما بێ ئارامیەکا مەزن ل تەڤاھیا ھەرێمێ. ھەروھا گۆت: “گەر باکور و رۆژھلاتێ سووریەیێ بەر ب پارچەبوونێ ڤە بچە، دێ ئیراق و ترکیە ژی ب ئاوایەکی مەزن زرارێ ببینن.”
د داویا ئاخافتنا خوە دە، ئەحمەد ئەل-شەرع ب سۆزا پاراستنا یەکپارچەبوونا ئاخا سووریەیێ ئاخافتنا خوە ب داوی کر و گۆت: “سووریە دەست ژ یەک بھوستا ئاخا خوە بەرنەدە.”
