وەزیرێ کارێن دەرڤە یێ ترکیەیێ ھاکان فیدان ل رۆمایا پایتەختا ئیتالیایێ، د کۆنفەرانسەکا کو ژ ئالیێ ئەنستیتویا پێوەندیێن ناڤنەتەوەیی (IAI) ڤە ھاتبوو سازکرن دە دەربارێ مژارێن د رۆژەڤا ھەرێم و جیھانێ ئاخڤی.
فیدان دیار کر کو دەربارێ بوویەرێن ل سووریەیێ دە نرخاندنێن وان ھەنە و گۆت:
“ئەم د وێ باوەریێ دە نە کو ئەگەر (یەپەگە) کاربە لگەل حکوومەتا شامێ ل ھەڤ بکە، دێ ئەڤ یەک باش بە، ژ بەر کو وان 10ی ئادارێ رێکەفتنەک ئیمزە کربوو.
ھەر چەند ئەم سەدی سەد ژ خالێن وێ نە رازی بن ژی ب گشتی، ئەگەر ھەر دو ئالی ژی پابەندی وێ ببن، ئەم دفکرین کو ئەڤە دێ باش بە.”
فیدان گۆت کو؛ ئەو نھا دبینن یەپەگە ژ بۆ بجھانینا رێکەفتنێ ل پاش دمینە و گۆت: “ئەو د پێشخستنا رێکەفتنا خوە یا لگەل حکوومەتا شامێ خوە گران دکە.
ئەز دفکرم ئەو نھا ھێڤی دکن کو ژ کریزا کو ئیسرایلێ ل سووریەیێ دەرخستیە ژ بۆ خوە دەرفەتان بافرینن.
ئەو وسا دفکرن کو ئەگەر پێلەکا نوویا نەئارامیێ ل سووریەیێ دەرکەڤە، دبە کو ئەڤ ژ بۆ پێشەرۆژا وان باشتر بە.
نھا ئەم دبینین کو گەلەک ئەندامێن پەکەکێ یێن ژ ئیراق و ئیرانێ لگەل یەپەگێ کار دکن.
ئەو نە ژ بۆ سووریەیێ، ژ بۆ شەرێ ل دژی مە ل وێ دەرێ نە. ژ بەر ڤێ یەکێ، ھەتا کو ئەڤ گەف ھەبن، ئەم نکارن ژ رەوشێ رازی بن و دڤێت ئەم تەدبیرێن پێویست وەربگرن.
وەکی کو من گۆت، نھا ئەم شانسەکی ددن ھەم شامێ و ھەم ژی یەپەگێ کو پرسگرێکێن خوە چارەسەر بکن.
دەما ئەم ڤێ دکن، ئەم ل بەندێ نە کو ئەو ھەم بەشداری ئارامیا گشتی یا سووریەیێ ببن ھەم ژی فکارێن مەیێن ئەولەھیێ ژ ھۆلێ راکن.
ژ بۆ کو ئەم بگھیژن ڤێ ئارمانجێ، ئەم ھەموو ئاموورێن د دەستێ خوە دە ب رێیێن ئاشتیانە ب کار تینن.
لێ دوبارە دکم، تشتێ کو ئەم ل ڤر خزمەتا وێ دکن، ئەولەھیا مە یا نەتەوەیی یە. ئەگەر کار بەر ب خەرابیێ ڤە بچن، دبە کو ئالتەرناتیڤەکا دن نەمینە.”
