سەرۆککۆمارێ ترکیەیێ رەجەب تەییب ئەردۆگان راگھاند، وەک سەدسال بەرێ جارەکا دن تێ خوەستن ل ناڤچەیێ سینۆر ب خوینێ وەرن دیارکرن. لێ ئەو وەک ترکیەیێ رێ نادن ڤێ یەکێ و داگیرکەریێن نوو. ئەردۆگان گۆت، سالەک بەرێ وەک پرۆژەیا دەولەتێ دەست ب پرۆسەیا ئاشتی کرنە و باجا ڤێ یەکێ چبە ژی ئەو ژێ ڤەناگەرن.
ئەردۆگان ئیرۆ 13ێ ئیلۆنێ ل ستەنبۆلێ د جڤینەکا ئاکادەمیا سەر ب پارتیا خوە دە بال کشاند سەر پرۆژەیا کو ئەو وەک “پرۆسەیا ترکیەیەکە بێتەرۆر” ب ناڤ دکە و گۆت: “سالەک بەرێ وەک پرۆژەیا دەولەتێ مە دەست ب پرۆسەیا ترکیەیا بێتەرۆر کر و ب ھەمان بریارداریێ ئەم بەردەوام دکن. د ڤێ دەمێ دە مە ھەر ھەولەکا تێکدانا پرۆسەیێ ڤالا دەرخست. ئەم ب سەبر، ھشیاری و ژ دل پرۆسەیێ گاڤ ب گاڤ برێڤە دبن.”
ئەردۆگان سۆزا خوە یا ژ بۆ ئاڤاکرنا یەکیتیەکا ناڤخوەیی تەکەز کر و وھا ئاخڤی: “ئەم دێ دیوارێ د ناڤبەرا ملەتی دە ھلوەشینن و ئاشتی، براتی و گەشەدانێ ئاڤا بکن. باجا ڤێ چ دبە بلا ببە، ئێدی ڤەگەر نینە.”
سەرۆککۆمارێ ترکیەیێ دەربارێ رەوشا ھەرێمێ دە نیگەرانیا خوە ئانی زمان و گۆت: “ل ناڤچەیا مە جارەکا دن تێ خوەستن سینۆر ب خوین و رۆندکێن چاڤان بھێنە دیارکرن. لیستکا دابەشکرن و رێڤەبرنێ ددۆمە،” وی گۆت.
ئەردۆگان وەک چارەسەری بانگا براتیا گەلان کر و وھا پێ دە چوو: “براتیا مە دکارە ھەموو لیستکان خەراب بکە. ترک، کورد و عەرەب، چاوا کو ھەزار سالە ئەم ل گەل ھەڤ ژیانە، دیسا ب ھەمان شێوازێ وەک برا ئەم دێ بژین. چ گومانا من ژ ڤێ نینە.”
ھەروھا ئەردۆگان بانگ ل گەلێن جیران ژی کر و گۆت: “ئەم ژ گەلێن دەرڤەیی سینۆرێن خوە ژی دخوازین بلا رێ نەدن ڤان لیستکان.”
