گۆرەکی دن یێ ب کۆم ل قەزایا شنگالێ هات دیتن، ب ڤی ئاوایی ژی هەژمارا گشتی یا گۆرێن ب کۆم یێن کو هه‌یا رۆژا مه یا ئیرۆ ل وێ ده‌رێ هاتنه دیتن، گهیشت 93 گۆرێن ب کۆم.
چالاکڤانێ مافێن مرۆڤان تەحسین شێخ کالۆ ئیرۆ یەکشەم، 21ێ ئیلۆنا 2025ێ دیتنا گۆرەکی دن یێ ب کۆم ل قەزایا شنگالێ راگهاند، ب ڤی ئاوایی ژی هەژمارا گشتی یا گۆرێن بکۆمێ کو پشتی دەرخستنا داعشێ ژ وێ قەزایێ هاتنە دیتن گهیشت 93 گۆرێن بکۆم.
تەحسین شێخ کالۆ د داخویانیەکە رۆژنامەڤانی دە راگهاند، تیمێن تایبەت ئەو گۆر ل دەڤەرا جەزیرەیێ ل باشوورێ شنگالێ دیتیە، کو بەرماییکێن یەک ژ قوربانیان هاتنە دەرخستن و ناسنامەیا وی تێ ناسکرن. کۆلاندن بەردەوامە، هەروەسا تێ پێشبینیکرن کو زێدەتر قوربانی بێن دیتن، کو ل سالا 2014ێ ژ ئالیێ داعشێ ڤە هاتنە کوشتن.
ناڤبری ئاماژە ژی دا، پرانیا قوربانیێن د وی گۆری دە ژن و زارۆکن و ب کۆم هاتنە کوشتن.” هەروەسا گۆت، تشتێن کو هەتا نها هاتنە دیتن تەنێ پارەکە کێم ژ مەزناهیا وێ کارەساتێ نیشان ددن، ژ بەر کو ب هەزاران ئێزدی هەتا نها وندانە.
وێ چالاکڤانیێ تەکەز ژی کر، دبە کو ب کۆلاندن و پشکنینێن بەردەوام زێدەتر گۆر ئەشکەرە ببن، ئەڤ ژی بالێ دکشینە سەر ئاستا وان تاوانان یێن کو داعشێ ل دژی جڤاکا ئێزدییان ل شنگالێ و دەڤەرێن دەردۆرا وێ کرنە.
ژ پشتی رزگارکرنا شنگالێ ل سالا 2015ێ ڤە، تیمێن شارەزایێن ناڤخوەیی و ناڤنەتەوەیی ژ بۆ کۆلاندنا گۆرێن ب کۆمێن کو ژ هێلا داعشێ ڤە هاتنە چێکرن دخەبتن، ب هەر کۆلاندنەکێ رە ژی زێدەتر ئاستا وێ کارەساتا مرۆڤی یا کو ب سەرێ ئێزیدیان هاتیە ئەشکەرە دکن.
