سەرۆکێ سووریەیێ ئەحمەد شەرع د ئاخافتنا خوەیا یەکێ دە ل نیو یۆرکێ راگھاند کو، زرار د ھەمی سەکتۆران دە بەرچاڤن و ژ بۆ ژ نوو ڤە ئاڤاکرنا سووریەیا وندابوویی پیدڤی یەکیتیا گەل و پلانەکا خورتە.
ئەحمەد شەرع لگەل شاندەکا جڤاکا سووریەیێ ل ئامەریکایێ جڤیا و تەڤی جوداھیان تەکەز ل سەر پێدڤیتیا ب یەکیتیا نەتەوەیی کر. ھەروەسا گۆت، “سووریا دکارە کو جارەکا دن ببە بووکا رۆژھلاتا ناڤین.” ئاماژە ژی دا کو، گەلێن جیھانێ چاڤدێریا بوویەرێن سووریەیێ دکن و دەرفەتەکێ ددن خەلکێ سووریەیێ کو خوە بسەلمینن، تەڤی زەحمەتیێن د رێیێ دە.”
ئاژانسا سانایێ یا نووچەیان راگھاند کو، ئەحمەد شەرع ب سەردانەکا دیرۆکی گھیشتیە نیو یۆرکێ، کو ژ سالا 1967ێ ڤە ئەڤ تەڤلیبوونا یەکێ یا سەرۆکەکی سووریەیێ د جڤینێن جڤاتا گشتییا نەتەوەیێن یەکگرتی دەیە.
پێشتر ژی سەرۆکێ سووریەیێ د ھەڤپەیڤینەکێ دە ژ بۆ تەلەڤیزیۆنا CBS داخواز ژ جیھانێ کر کو ئالیکاریا سووریەیێ بکن و گۆت، “بەرێ جیھانێ سووریە تووشی کارەساتان کر، لێ نھا ھەر کەس دکارە ب راکرنا سزایێن ل سەر سووریەیێ ئالیکاریێ بکە.”
ئەحمەد شەرع ئاماژە ب وێ یەکێ ژی کر کو، ھلوەشینا رەژیما بەشار ئەسەد ل سووریەیێ بوویە سەدەم کو ھندەک کۆمێن چەکدارێن گرێدایی وەلاتێن دن ژ سووریەیێ دەرکەڤن.
سەرۆکێ سووریەیێ د بەشەکا دن یا ئاخافتنا خوە دە تەکەز ل سەر پێدڤیتیا ڤەگەراندنا پەنابەرێن سووریەیی ژ بۆ وەلاتێ وان کر.
