ئۆزگوور ئۆزەل وەکی سەرۆکێ پارتیا گەلا کۆماری (جەهەپێ)، کو پارتیا ھەری مەزن یا ئۆپۆزسیۆنا ترکیەیێ یە، د کۆنگرەیەکە ئاوارتە دە جارەکە دن ھات ھلبژارتن. ئەڤ پێنگاڤ د دەمەکێ دەیە کو، تێ چاڤەرێکرن کو مەھا بێ دادگەھ بریارێ ل سەر دوورخستنا وی و ھەژمارەکا سەرکردەیێن دن یێن وێ پارتیێ بدە.
کۆنگرەیا جەهەپێ دوھی رۆژا یەکشەمب، 21ێ ئیلۆنا 2025ێ ھات لدارخستن و تێ دە ئۆزگوور ئۆزەل، کو تاکە کاندید بوو، ب 835 دەنگان ژ 917 دەنگێن تەڤلیبوویییان وەکی سەرۆکێ وێ پارتیێ ھات ھلبژارتن.
ئارمانج ژ ڤێ کۆنگرەیا ئاوارتە خوەپاراستنا ژ بریارەکس چاڤەرێکری یا دادگەھا ئەنقەرێیە، کو بریارە ل رۆژا 24ێ جۆتمەھێ دەربکەڤە. دادگەھ دفکرە کا کۆنگرەیا جەهەپێ یا 2023ێ، کو ئۆزگوور ئۆزەل تێ دە وەکی سەرۆک ھاتبوو ھلبژارتن، ژ بەر “بێسەرووبەریێ” ھلوەشینە یان نا.
رەخنەگرێن حکوومەتێ ڤێ دۆزێ وەکی دەلیلەک ژ بۆ ڤەگەراندنا ترکیەیێ بەر ب دیکتاتۆریێ د بن سەرۆکاتیا سەرۆککۆمار رەجەب تەییب ئەردۆگان دە دبینن.
رایەدارێن جەهەپێ ھێڤی دکن کو، ب بدەستخستنا باوەریەکا نوو ژ ئەندامێن پارتیا خوە، خەتەرێن بریارا دادگەھێ ل سەر ھلبژارتنا ئۆزگوور ئۆزەل ل سالا 2023ێ کێم بکن.
12 ئەندامێن جەهەپێ، تەڤی شارەدارێ ستەنبۆلێ یێ گرتی ئەکرەم ئیمامۆغلو، کو ھەروەسا ھەڤرکێ سیاسی یێ ھەری مەزن یێ ئەردۆگانە، رووبروویی گەلەک تۆمەتان بوونە وەکی دایینا پەرە و پۆستان ب ئەندامێن کۆنگرەیێ و بنپێکرنا قانوونا پارتیێن سیاسی یا ترکیەیێ.
ژ پشتی گرتنا ئمامۆغلو ل مەھا ئادارێ ڤە، ئۆزگوور ئۆزەل وەکی هەڤرکێ ھەری مەزن یێ ئەردۆگان دەرکەتیە ھۆلێ. ئەردۆگان گەلەک جاران ئێریشی جەهەپێ کریە و ئەو وەکی گەندەل و سەختەکار تۆمەتبار کریە.
جەهەپێ د پارلامەنتۆیا ترکیەیێ دە ھێزا ئۆپۆزسیۆنێ یا ھەری مەزنە و شارەداریێن باژارێن ھەری مەزن یێن ترکیەیێ، وەکی ستەنبۆل و ئەنقەرەیێ، د دەستێن وێ دە نە.
