پشتی داخویانیێن سەرۆکێ گشتی یێ مەھەپێ دەولەت باخچەلی یێن دەربارێ دەستپێکرنا “پێڤاژۆیەکا نوو” دە، ھەڤسەرۆکا گشتی یا دەم پارتیێ تولای ھاتیمۆغلاری راگھاند، ئەو پێشنیارا باخچەلی یا دەربارێ چوونا کۆمیسیۆنەکێ بۆ ئیمرالیێ دە “گەلەک گرینگ” دبینن و ئەڤ یەک ژ بۆ دەرباسبوونا قۆناغەکا نوو پێنگاڤەکا ئەرێنییە.
پشتی ئاخافتنا سەرۆکێ گشتی یێ مەھەپێ دەولەت باخچەلی کو تێ دە بەحسا “ژداییکبوونەکا پیرۆز” و ئامادەکرنا “نەخشەرێیەکێ” کربوو، یەکەم بەرتەک ژ دەم پارتیێ ھات.
ھەڤسەرۆکا گشتی یا دەم پارتیێ تولای ھاتیمۆغلاری ئیرۆ 7ێ جۆتمەھێ د داخویانیەکا رۆژنامەڤانی دە بال کشاند سەر گۆتنێن باخچەلی یێن دەربارێ رێبەرێ پەکەکێ عەبدوللاھ ئۆجالان دە و وھا گۆت: “باخچەلی ئیرۆ گۆت، کۆمیسیۆن دکارە بچە ئیمرالیێ و ب ناڤێ جڤاکا ترکیەیێ چ پرسان دخوازن بلا ژێ بکن و ژ بۆ رایا گشتی پارڤە بکن. ئەم تەڤلی ڤێ نێرینێ دبن.”
ھاتیمۆغلاری تەکەز کر، ئەڤ پێنگاڤ ژ بۆ پێشەرۆژا پێڤاژۆیێ گرنگە و وھا دۆماند: “دڤێت کۆمیسیۆن تەکەز بچە ئیمرالیێ و وەک دانووستاندکار ل گەل برێز عەبدوللاھ ئۆجالان بجڤە. ئەڤ یەک ژ بۆ دەرباسبوونا قۆناغەکا نوو گەلەک گرینگە.”
دەربارێ بانگا کو ژ ھێزێن سووریەیا دەمۆکراتیک (ھەسەدێ) رە وەرە کرن ژی، ھاتیمۆغلاری گۆت، ئەو نکارن ل سەر ناڤێ کەسی بریارێ بدن و گۆت: “بلا کۆمیسیۆن بچە و ل گەل ئۆجالان بجڤە و نێرینا وی بگرە.”
باخچەلی چ گۆتبوو؟
ئەڤ داخویانی پشتی ئاخافتنا دەولەت باخچەلی یا د جڤینا پارتیا خوە دە ھات. باخچەلی د ئاخافتنا خوە دە گۆتبوو: “ترکیە ھاتیە بەر قۆناغا ژداییکبوونەکا پیرۆز. پێویستە ژ بۆ سەرەراستکرنێن یاسایی و سیاسی، بنگەھا دانووستاندنان و نەخشەرێیەک بهێت ئامادەکرن.”
باخچەلی د بەردەوامیا ئاخافتنا خوە دە دیار کربوو کو ئارمانجا وان “ترکیەیەکا بێ تەرۆر”ە و گۆتبوو: “پێوەندیا برایێن مەیێن کورد ب تەرۆرێ رە نینە. ئەگەر سیاسەت تێ خوەستن، وێ دەمێ دڤێت ھەموو چەک وەرن شەوتاندن.”
