باخچەلی: ژ بۆ مە تەنێ داخویانیا ئیمرالیێ یا 27ێ شوباتێ بنگەھینە
سەرۆکێ گشتی یێ مەھەپێ دەولەت باخچەلی، دەربارێ “پێڤاژۆیێ” دە رەخنە ل دەم پارتیێ گرت و “خەتا سۆر” یا پارتیا خوە ئەشکەرە کر و گۆت، “ژ بۆ مە تەنێ داخویانیا ئیمرالیێ یا 27ێ شوباتێ بنگەھینە.” سەرۆکێ مەھەپێ دەولەت باخچەلی د جڤینا فراکسیۆنا پارتیا خوە یا ل پارلامەنتۆیێ دە، ل سەر رۆژەڤا سیاسی و پێڤاژۆیێ ئاخڤی.
باخچەلی دیار کر، ئارمانجا وان ئەوە کو ب رێیا دانووستاندن و شێورێ ھەموو پرسگرێکێن ترکیەیێ چارەسەر بکن و پرۆسەیا ئاشتیێ ژی ب ڤێ مەبەستێ ھاتیە دەستپێکرن.
لێبەلێ، باخچەلی رەخنەیێن توند ل ھەلوەست و گۆتارێن بەرپرسێن دەم پارتیێ گرتن و ئیدیعا کر کو ئەو ب زمانەکی بەرپرسیار تەڤناگەرن. وی ئاماژە ب دروشمێن کو ل پارلامەنتۆیێ تێن ئاڤێتن کر و ئەڤ یەک وەکە “زێدەگاڤی” ب ناڤ کر.
“داخویانیا 27ێ شوباتێ بنگەھینە”
باخچەلی دیار کر کو ئەو ژ بلی داخویانیا رێبەرێ پەکەکێ عەبدوللاھ ئۆجالان یا د 27ێ شوباتێ دە، چ داخویانی و نێرینەکا دن قەبوول ناکن و ئەو ژ بۆ وان بێواتە نە.
باخچەلی وھا ئاخڤی: “کۆمیسیۆنا پرۆسەیا ئاشتیێ دگھیژە داویا کارێن خوە. ھەلبەت توندیا چل و یەک سالان د رۆژەکێ دە ب داوی نابە. لێ دڤێت ھەموو کەس و ب تایبەت ئالیێ دانوستاندکار زمانەکی بەرپرسیار ب کار بینن. ل بن بانێ پارلامەنتۆیا ترکیەیێ جھ و پێویستیا دروشمێن زێدەگاڤی نینە. ژ بلی داخویانیا 27ێ شوباتێ یا ئیمرالیێ، ھەر گۆتنەک، نێرینەک، پێشنیاز و نرخاندنەک ل با مە بێواتەیە. ژ بۆ مە داخویانیا سەرۆکێ دامەزرینەر یا 27ێ شوباتێ بنگەھینە و ئەوێن کو د ڤێ ئاراستەیێ دە بەردەوام دبن ب ئاقل تەڤدگەرن.”
