مەدیایا ئیراقێ: ئیسماعیل قائانی ب سەردانەکە نەراگهاندی گهیشت بەغدایێ
هەڤدەم ل گەل پێوەندیا تەلەفۆنی یا د ناڤبەرا وەزیرێ دەرڤەیێ ئامەریکایێ و سەرۆکوەزیرێ ئیراقێ دەربارێ کۆمێن چەکدار دە، فەرماندارێ فەیلەقا قودسێ یا سوپایا پاسداران ئیسماعیل قائانی ب سەردانەکە نەراگهاندی گهیشت بەغدایێ.
ل گۆری چاڤکانیێن ژ بەغدایێ، شەڤا بۆری 21ێ جۆتمەهێ ئیسماعیل قائانی ب سەردانەکە نەپلانکری گهیشتیە پایتەختا ئیراقێ. تێ پایین کو قائانی د چارچۆڤەیا سەردانا خوە دە ل گەل سەرکردەیێن سیاسی یێن ئیراقێ و فەرماندارێن کۆمێن چەکدار رە بجڤە.
ئەڤ سەردان د دەمەکێ دە پێک تێ، وەزارەتا دەرڤە یا ئامەریکایێ راگهاندبوو کو وەزیرێ دەرڤە ماركۆ روبیۆ ب تەلەفۆنێ ل گەل سەرۆکوەزیرێ ئیراقێ محەمەد شه‌یاع سوودانی ئاخڤیە.
ل گۆری داخویانیا وەزارەتێ، روبیۆ تەکەزی ل سەر “گرینگیا بێچەککرنا بلەز یا وان کۆمێن چەکدار کریە کو سەروەرییا ئیراقێ لاواز دکن، گەفێ ل ژیان و بازرگانیا ئامەریکی و ئیراقیان دخون و چاڤکانیێن دارایی تالان دکن.”
د هەمان پێوەندیێ دە، وەزیرێ ئامەریکی ژ بەر دوبارە دەستپێکرنا هناردەکرنا پەترۆلا هەرێما کوردستانێ ژ بەندەرا جەیهانێ پیرۆزباهی ل سوودانی کربوو و گۆتبوو کو ئەڤ پێنگاڤ د بەرژەوەندییا ئابۆریا ئیراق، ترکیە و ئامەریکایێ دە یە.
هەر وها د داخویانیێ دە هاتبوو دەستنیشانکرن کو ئامەریکا ژ بۆ پاراستنا سەروەرییا ئیراقێ، خورتکرنا ئیستقرارا هەرێمێ و بهێزکرنا تێکلیێن ئابۆری پابەندی هەڤکارییا خوە یا ل گەل ئیراقێ یە.
