شاندەیا ئیمرالیێ دێ جارا سێیەم ب ئەردۆگان رە بجڤە
سەرۆکوەکیلا کۆما دەم پارتیێ گولستان کلچ کۆچییگیت راگهاند، هەڤدیتنێن د ناڤبەرا شاندەیا ئیمرالیێ و سەرۆککۆمارێ ترکیەیێ دە دێ بەردەوام بکن، لێ دیرۆکا هەڤدیتنا نوو هین نەهاتیە ئەشکەرەکرن.
سەرۆکوەکیلا کۆما پارتیا وەکهەڤی و دەمۆکراسیێ یا گەلان (دەم پارتی) گولستان کلچ کۆچییگیت د داخویانیەکێ دە ژ چاپەمەنیێ رە ئەشکەرە کر، شاندەیا ئیمرالیێ دێ ژ بۆ جارا سێیەم ب سەرۆککۆمارێ ترکیەیێ رەجەپ تایییپ ئەردۆگان رە هەڤدیتنێ پێک بینە.
کۆچییگیت دیار کر، د شاندەیێ دە وەکیلا سەرۆکێ پارلامەنتۆیا ترکیەیێ و پارلامەنتەرا وانێ یا دەم پارتیێ پەرڤین بوولدان و پارلامەنتەرێ رهایێ میتهات سانجار جهـ دگرن.
لێ بەلێ، کۆچییگیت دەربارێ دیرۆکا هەڤدیتنا سێیەم دە ئاگاهیەکە زەلال نەدا.
دو هەڤدیتنێن بەرێ
هەڤدیتنا یەکەما د ناڤبەرا شاندەیا ئیمرالیێ و ئەردۆگان دە رۆژا 10ێ نیسانێ ل بەشتەپەیێ پێک هاتبوو و وەک یەکەم هەڤدیتنا پشتی 13 سالان هاتبوو تۆمارکرن. د وێ هەڤدیتنێ دە، ل گەل پەرڤین بولدان، پارلامەنتەرێ ستەنبۆلێ سری سورەییا ئۆندەر ژی ئامادە بووبوو.
هەڤدیتنا دویەم ژی د 7ێ تیرمەهێ دە ل کوڵیەیا سەرۆککۆماریێ هاتبوو کرن. د جڤینا کو نێزیکی سائەتەکێ دۆم کر دە، ژ بلی بوولدان و سانجار، وەکیلێ سەرۆکێ گشتییێ ئاک پارتیێ ئەفکان ئالا و سەرۆکێ میتێ ئیبراهیم کالن ژی بەشدار بووبوون.
