ئەحمەد شەرع سەرەدانا عەرەبستانا سعوودی دکە

 سەرۆکێ سووریەیێ یێ قۆناغا ڤەگوھێز ژ بۆ نیقاشکرنا چەند مژارێن گرینگ سەردانا عەرەبستانا سعوودی دکە.

ئاژانسا سانایێ یا نووچەیان یا فەرمی یا سووریەیێ راگھاند: “سەرۆکێ سووریەیێ یێ قۆناغا ڤەگوھێز ئەحمەد شەرع سبە سێشەمبێ، 28ێ جۆتمەھا 2025ێ، سەردانا عەرەبستانا سعوودی دکە، دا کو چەند مژارێن گرینگ ب شانشینێ سعوودی محەمەد بن سەلمان رە نیقاش بکە.”

ھەر ل گۆری وێ چاڤکانیێ، ئەحمەد شەرع دێ د چارچۆڤەیا وێ سەردانێ دە خورتکرنا ئالیکاریێن ھەڤپار د ناڤبەرا ھەردو وەلاتان دە، ب تایبەتی د وارێن وەبەرھێنان و ئابۆریێ دە، و ھەروەسا چەند مژارێن دن ژی یێن گرینگ لگەل شانشینێ سعوودی نیقاش بکە.

وێ چاڤکانیێ ئاماژە ژی دا: “سەرۆکێ سووریەیێ ھەر د چارچۆڤەیا وێ سەردانێ دە دێ تەڤلی کۆنفەرانسا پێشەنگیا وەبەرھێنانا پاشەرۆژێ بە، کو دێ ل ریازا پایتەختا وی وەلاتی هێت لدارخستن.”

کۆنفەرانسا پێشەنگیا وەبەرھێنانا پاشەرۆژێ دێ ئیرۆ دوشەمبێ، 27ێ جۆتمەھا 2025ێ، دەست پێ بکە و دێ ھەتا رۆژا پێنجشەمێ (30ێ جۆتمەھا 2025ێ) بەردەوام بە، کو دێ نێزیکی 8 ھەزار کەسان ژ چار ئالیێن جیھانێ تەڤلی وێ ببن.

ژ پشتی ھلوەشینا رەژیما بەشار ئەسەد ل سووریەیێ د داویا سالا بۆری دە، ئەڤ سەردان دێ سەردانا سێیێ یا فەرمی یا سەرۆکێ سووریەیێ یێ قۆناغا ڤەگوھێز ئەحمەد شەرع ژ بۆ عەرەبستانا سعوودی بە.