ئەردۆگان و شاندا ئیمرالیێ دجڤن
د چارچۆڤەیا پرۆسەیا ئاشتیێ دە، سەرۆککۆمارێ ترکیەیێ رەجەپ تاییپ ئەردۆگان دێ سبە ل گەل پارلامەنتەرێن دەم پارتیێ و ئەندامێن شاندا ئیمرالیێ بجڤە. تێ چاڤەرێکرن کو د جڤینێ دە قۆناغا هەری داوی یا پرۆسەیا ئاشتیێ و پێنگاڤێن یاسایی یێن پێویست بێن گۆتووبێژکرن.
مەدیایا نێزیکی دەم پارتیێ راگهاند، پارلامەنتەرێن دەم پارتیێ پەرڤین بوولدان و میتهات سانجار و ئەندامێن شاندا ئیمرالیێ دێ سبە، 30ێ جۆتمەهێ، ل گەل سەرۆککۆمارێ ترکیەیێ رەجەپ تاییپ ئەردۆگان بجڤن.
ئەڤ جڤین وەکە سێیەمین هەڤدیتنا د ناڤبەرا هەردو ئالیان دە تێ زانین و وەکە پێشهاتەکە نوو و گرینگ د پرۆسەیا ئاشتیێ دە تێ نرخاندن. ب تایبەتی کو ئەڤ هەڤدیتن پشتی پێنگاڤا دیرۆکی یا ڤەکشاندنا هەموو هێزێن په‌كه‌كێ ژ ئاخا ترکیەیێ پێک تێ.
سەرۆککۆمارێ ترکیەیێ دەربارێ جڤینێ دە راگهاندیە کو ئەوێ ل گەل شاندا دەم پارتیێ پێشهاتێن هەری داوی یێن گرێدایی پرۆسەیێ گۆتووبێژ بکن.
ئەڤ جڤین د دەمەکێ دە تێ کو بەندەواری ژ بۆ ئاڤێتنا گاڤێن بەربچاڤێن یاسایی و سیاسی ژ ئالیێ حکوومەتا ترکیەیێ ڤە زێدە بوونە.
