نوونەرێ ئامەریکایێ ل ئیراقێ تەکەز ل سەر کۆنترۆلکرنا کۆمێن چەکدار کر

داخویانیا یەکێ یا نوونەرێ تایبەتێ ئامەریکایێ ل ئیراقێ مارک ساڤایا نیقاشەکا توند ل سەر پاشەرۆژا ئەولەھی و سەروەریا ئیراقێ چێ کریە.

مارک ساڤایا د بەیاننامەیەکێ دە تەکەز ل سەر پێدڤیتیا یەککرنا ھەمی ھێزێن چەکدار د بن فەرمانداریا حکوومەتا ناڤەندی دە کر و راگھاند: “چ جھ ژ بۆ کۆمێن چەکدار نینە کو ل دەرڤەیی دەستھلاتداریا دەولەتێ تەڤبگەرن.”

ئەڤ داخویانی ب زەلالی داخوازا واشنتۆنێ ژ بۆ دارێتنا ھەڤسەنگیا ھێزێ ل ئیراقێ نیشان ددە، ب تایبەتی ژی د دەمەکێ دە کو نیگەرانی ل سەر باندۆرا ھەڤرکیێن دەڤەرێ ھەیە، وەکی ناکۆکیێن د ناڤبەرا ئیران و ئیسرایلێ دە، ل سەر تەناھیا ناڤخوەیی یا ئیراقێ.

ساڤایا د بەیاننامەیا خوە دە تەکەز ژی کر کو، ئەرکێ وەلاتێ وی ل ئیراقێ “بدەستخستنا تەناھی، سەروەری و خێر و خوەشیان”ە. ھەروەسا داخوازا “ھەڤپاریەکا نێزیک” د ناڤبەرا بەغدا و ھەولێرێ دە کر، دا کو ئیراقەکا خوەدی “سەروەریا تەڤاھی، بێ دەستوەردانا دەرڤە، ب تایبەتی ژ ئالیێ ئیران و وەکیلێن وێ ڤە” چێ ببە.

ئەڤ پێشکەتن لگەل بەلاڤبوونا ھندەک راپۆرتێن مەدیایی ھەڤدەمن، کو دبێژن قاشۆ ھندەک کۆمێن چەکدارێن ئیراقی یێن نێزیکی تەھرانێ خوە ژ بۆ ئێریشەکا چاڤەرێکری ل دژی ئیسرایلێ ئامادە دکن، کو ڤێ یەکێ ژی رەوش ئالۆزتر کریە.

سەرۆکێ ئامەریکایێ دۆنالد ترامپ ل رۆژا یەکشەمێ 19ێ جۆتمەھا ٢٠٢٥ێ، مارک ساڤایا وەکی نوونەرێ خوەیێ تایبەت ل ئیراقێ دەستنیشان کر.

ترامپ ھەروەسا پەسنێ ساڤایا دابوو و گۆتبوو: “ئەز کێفخوەشم کو رادگھینم کو مارک ساڤایا دێ وەکی نوونەرێ تایبەتێ ئامەریکایێ ل ئیراقێ کار بکە. تێگھیشتنا کوور یا مارک د تێکلیێن ئیراق و ئامەریکایێ و تێکلیێن وێ یێن ل دەڤەرێ دە دێ ببە ئالیکار کو بەرژەوەندیێن گەلێ ئامەریکایێ پێشڤە بچن.”