هۆشداریه‌كا توند ژ ئه‌مه‌ریكایێ بۆ ئیراقێ
ل گۆری مەدیایا ئیراقێ، وەزیرێ به‌رگریێ یێ ئه‌مه‌ریكایێ هۆشداریه‌كا توند دایە ئیراقێ کو د دەمەکێ نێزیك دا دێ ئۆپەراسیۆنەکا مەزن یا سەربازی ل ده‌ڤه‌رێ دەست پێ كه‌ت. ئه‌مه‌ریكایێ داخواز کریە کو کۆمێن چەکدار یێن ل ئیراقێ ب چ ئاوایی تەڤلی نەبن و گەف كرینه کو ئەگەر تەڤلی ببن، دێ ئەنجامێن وێ “گەلەک خراب” بن.
چاڤکانیەکێ مەدیایی یا ئیراقێ راگهاند، وەزیرێ به‌رگریێ یێ ئه‌مه‌ریكایێ د پەیوەندیەکا تەلەفۆنی دا، هشیاریەکا توند دایە بەرپرسێن پایەبلندێن سەربازی یێن ئیراقێ. ل گۆر داخویانیێن وەزیرێ به‌رگریێ یێ ئیراقێ سابت عەباسی، ئه‌مه‌ریكایێ ئاگاهداری دایە وان کو ئۆپەراسیۆنەکا مەزن ل ده‌ڤه‌رێ تێ پێشبینی كرن، کو ئەگەر هەیە ژ ئالیێ ئه‌مه‌ریكا و ئیسرائیلێ ڤە ل دژی ئیرانێ بێ کرن.
د پەیوەندیا تەلەفۆنی دا، کو ژ بلی وەزیرێن به‌رگریی، سەرفەرماندارێ ئارتێشا ئیراقێ و بەرپرسێن ئیستخباراتێ ژی بەشدار بوونە، ئالیێ ئه‌مه‌ریكی ب ئاوایەکی زەلال داخواز کریە کو “کۆمێن چەکدارێن ل دەرڤەیی یاسایێ” یێن ل ئیراقێ ب چ ئاوایی نەبن پارچەیەک ژ ئالۆزییان. وه‌زیرێ به‌رگریێ یێ ئه‌مه‌ریكایێ د داویا ئاخافتنا خوە دە گۆتیە: “ئەڤ هشیاریا مە یا داوییە ژ بۆ وە و هوون باش دزانن کو دێ بەرسڤا رێڤەبەریا نها یا ئه‌مه‌ریكایێ چاوا بیت.”
ئەڤ هشیاری وەک هەولدانەک تێ دیتن ژ بۆ رێگرتنا ل هەر بەرتەکەکە گەنگاز یا کۆمێن چەکدارێن نێزیکی ئیرانێ ل ئیراقێ ل هەمبەر هەر تەڤگەرەکا سەربازی یا ئه‌مه‌ریكایێ.
“جهـ ژ کۆمێن چەکدار رە نینە”
ژ ئالیێ خوە ڤە، نوونەرێ تایبەتێ ئه‌مه‌ریكایێ ژ بۆ ئیراقێ مارک ساڤایا، ل سەر هەژمارا خوە یا تۆرا جڤاکی “X” نڤیساندبوو، هەلوەستا ئه‌مه‌ریكایێ زەلالە: “جهـ ژ بۆ کۆمێن چەکدارێن کو ل دەرڤەیی دەستهلاتا دەولەتێ کار دکن نینە.”
ساڤایا دەستنیشان کر کو ئارامی و سەروەرییا ئیراقێ ب هەبوونا هێزەکا ئەولەکاریێ یا یەکگرتی یا د بن فەرمانا حکوومەتێ دا گرێدایی یە. هەروه‌ها بال کشاند سەر گرنگیا هەڤکارییا د ناڤبەرا حکوومەتا فەدەرال و هەرێما کوردستانێ دا ژ بۆ مسۆگەرکرنا ئەولەهیێ.
ئەڤ پێشهات د دەمەکێ دا یە کو سەرۆکوەزیرێ ئیراقێ محەمەد شه‌یاع سوودانی راگهاندبوو، ئەو پابەندن هەموو چەکێن د دەستێ کۆمان دە بخن بن کۆنترۆلا دەولەتێ، لێ ئەڤ پێڤاژۆ ب ڤەکشینا هێزێن هەڤپەیمانان ڤە گرێ دابە.
