باخچەلی: ئۆجالان هه‌تا نها سۆزێن خوه ب باشی ب جیهـ ئانینه
سەرۆکێ گشتییێ مه‌په‌هێ ده‌وله‌ت باخچەلی ل جڤینا کۆما پارتیا خوە یا ل پارلامەنتۆیا ترکیێ ئاخڤی و گۆت: دڤێ کۆمیسیۆن بچە ئیمرالیێ و پەیامان ژ دەڤێ یەکەم وەربگرە. مه‌هه‌په ئامادەیە بچە ئیمرالیێ.
سەرۆکێ گشتییێ پارتیا تەڤگەرا نەتەوەپەرەست (مه‌هه‌پێ) ده‌وله‌ت باخچەلی، پشتگری دا وێ یەکێ کو کۆمیسیۆن بچە ئیمرالیێ و نێرینێن رێبەرێ په‌كه‌كێ عه‌بدوللا ئۆجالان وەرگرە.
ده‌وله‌ت باخچەلی دیار کر، “تیر ژ کەڤانێ دەرکەتیە و بەرێ خوە دایە ئارمانجا پیرۆز” و گۆت، ئارمانجا وان “ترکیەیا بێتەرۆر”ە.
باخچەلی دا زانین کو کۆمیسیۆنا ل پارلامەنتۆیێ هاتیە ئاڤاکرن گهشتیە داویا خەباتێن خوە و ژ بۆ چوونا ئیمرالیێ رۆناهیا کەسک پێ خست:
“دڤێ کۆمیسیۆن بچە ئیمرالیێ و پەیامان ژ دەڤێ یەکەم وەربگرە، ئەڤ یەک دێ پێڤاژۆیێ خورتتر بکە. نێرین و رامانێن رێبەرتیا دامەزرینەر یا په‌كه‌كێ ژ بۆ ڤێ قۆناغا داوی بێن وەرگرتن و نیقاشێن بێئەنجامێن کو ئەڤ چەند رۆژن ل سەر مژارێ تێن کرن، بێن بداویکرن. پارتیا تەڤگەرا نەتەوەپەرەست ئامادەیە بەشداری هەیئەتەکە وها ببە.”
باخچەلی ئانی زمێن کو ڤەکشینا په‌كه‌كێ ژ ترکیەیێ گەشەدانەکە گرینگە و گۆت، “هەتا نها ئیمرالیێ سۆزا خوە گرتیە و ل پشت داخویانیێن خوە سەکنییە. ژ بۆ کو ئەم ب هێڤی بن گەلەک سەدەمێن مە هەنە.”
سەرۆکێ گشتییێ مه‌په‌هێ هەر وها ل سەر پاشەرۆژا هسدیێ ژی ئاخڤی و گۆت: “ئەم تەڤلیبوونا ئەندامێن رێخستنێ ب چەکێن خوە ڤە بۆ ناڤ هه‌سه‌دێ/یه‌په‌گێ و داخوازا ئاڤاکرنا تومەنەکە جودا وەکی گەفەکە راستەراست ل سەر ئەولەهیا خوە یا نەتەوەیی دنرخینن.
بەردەوامکرنا هەبوونا په‌كه‌كێ د بن سیوانەکە دن دە، ل دژی ئارمانجێن ترکیەیا بێتەرۆر و هەرێما بێتەرۆرە.”
