6 پەیکەرێن زێرین ژ موزەخانەیا شامێ ھاتن دزین

موزەخانەیا نشتمانی یا سووریەیێ، کو تەنێ مەھەک بەرێ ژ نوو ڤە ھاتبوو ڤەکرن، راستی دزیەکا مەزن ھات. بەرھەمێن دزی، یێن کو نرخێ وان نایێ تەخمینکرن، ژ بەشا ھەری گرینگ یا موزەخانەیێ ھاتنە برن.

موزەخانەیا نشتمانی یا سووریەیێ ل پایتەخت شامێ راگھاند، شەش پەیکەرێن زێرین یێن سەردەما کەڤنار ژ موزەخانەیێ ھاتنە دزین. بوویەرا دزیێ شەڤا 10ێ مژدارێ پێک ھاتیە و تێ دە ھندەک خەنجەرێن زێرین ژی ھاتنە برن.

ل گۆری ئاگاھیێن، ئاژانسا فرانس-پرێس (AFP) بەلاڤ کرنە، شوونوارێن دزی ل “بەشا کلاسیک” یا موزەخانەیێ بوون، کو وەکە یەک ژ کەڤنترین و گرینگترین سازیێن چاندی یێن رۆژھلاتا ناڤین تێ ناسکرن. ئەڤ بەش بەرھەمێن کێم پەیدا یێن سەردەمێن ھێلەنیستی، رۆمانی و بیزانسی دحەوینە.

چاڤکانیەکە ئەولەھیێ ئاشکەرە کر کو پشتی بوویەرێ، ھەژمارەک کارمەند و پاسەوانێن موزەخانەیێ ژ بۆ لێپرسینێ ھاتنە دەستەسەرکرن، لێ پشترە دیسا ھاتنە بەردان.

ھەروھا، بەرپرسەکی ژ رێڤەبەریا موزەخانەیانا سووریەیێ ژ بۆ فرانس پرێس گۆتیە، د دەما دزیێ دە، ھێزێن ئەولەھیێ رێ نەدانە کو کارمەند بکەڤن ھوندرێ ھۆلێن موزەخانەیێ.

پشتی بوویەرێ، موزەخانە ژ بەر “سەدەمێن ئەولەھیێ” ژ بۆ دەمکی ھاتیە گرتن و تێ پایین کو ھەفتەیا بێ ژ نوو ڤە وەرە ڤەکرن. ھەتا نھا ژ ئالیێ دەستھلاتدارێن سووریەیێ ڤە ت داخویانیەکا فەرمی دەربارێ بوویەرێ دە نەھاتیە دایین.

ئەڤ دزی د دەمەکێ دە پێک تێ کو رێڤەبەریا گشتی یا شوونوار و موزەخانەیانا سووریەیێ د 8ێ چلەیا 2025ێ دە، پشتی رووخاندنا رەژیما بەشار ئەسەد، موزەخانە ژ نوو ڤە ڤەکربوو. وێ دەمێ رێڤەبەریێ پشتراست کربوو کو “چ زیانەک نەگھیشتیە موزەخانەیێ و ھەموو بەرھەم پاراستی نە.”