کۆمیسیۆنا ھەلبژارتنان: ئیرۆ ئەنجامێن دەستپێکێ دێ هێن راگەھاندن

 کۆمیسیۆنا بلند یا سەربخوەیا ھلبژارتنان یا ئیراقێ راگھاند، ئەو دێ ئیرۆ ئێڤاری ئەنجامێن دەستپێکێ یێن ھلبژارتنا پارلامەنتۆیێ ئاشکەرە بکە.

کۆمیسیۆنا بلند یا سەربخوەیا ھلبژارتنان یا ئیراقێ ئامادەکاریان دکە کو ئیرۆ دانێ ئێڤارێ ئەنجامێن دەستپێکێ یێن دەنگدانا گشتی و تایبەت یا خولا شەشەمین یا پارلامەنتۆیێ راگھینە.

بەردەڤکا کۆمیسیۆنێ جومانە خەلای راگھاند، ئیرۆ 12ێ مژدارا 2025ێ، دەمژمێر 18:00، ئەو دێ رێژەیا بەشداریێ و ئەنجامێن دەستپێکێ یێن ھلبژارتنێ ئاشکەرە بکن.

خالای ھەروھا دیار کر، دبە کو د دەما راگھاندنێ دە ھندەک گوھەرتن چێببن، ژ بەر کو کۆمیسیۆن ھین ژی ب پشتراستکرنا دانەیان ڤە مژوولە.

رێژەیا بەشداریێ و ئەنجاما پارتیێن کوردستانێ

پرۆسەیا دەنگدانا گشتی دوھ 11ێ مژدارێ و دەنگدانا تایبەت ژی رۆژا 9ێ مژدارێ، ل سەرانسەری ئیراق و ھەرێما کوردستانێ برێڤە چوو. ل گۆری ئامارێن کۆمیسیۆنێ، رێژەیا بەشداریێ د دەنگدانا تایبەت دە گھشتیە 82.42%، لێ د دەنگدانا گشتی دە نێزیکی 54.5% بوویە.

ل سەر ئاستا پارێزگەھێن ھەرێما کوردستانێ، ل گۆری ئەنجامێن نەفەرمی یێن دەستپێکێ:

– پارتیا دەمۆکراتا کوردستانێ (پەدەکێ) ب وەرگرتنا زێدەتری 1 ملیۆن و 80 ھەزار دەنگان د رێزا یەکەم دە جھ دگرە.

-یەکیتیا نشتمانییا کوردستانێ (یەنەکە) ب نێزیکی 535 ھەزار دەنگان د رێزا دویەمین دەیە.

– یەکگرتوویا ئیسلامی یا کوردستانێ ژی ب نێزیکی 165 ھەزار دەنگان د رێزا سێیەمین دەیە.

تەڤاھیا پارتی و ئالیێن سیاسی ل بەندا راگھاندنا فەرمی یا ئەنجامێن ژ ئالیێ کۆمیسیۆنێ ڤە نە.