پەرلەمانتارەکی جەهەپێ: مخابن، سەرۆکاتیا پارتیا مە خەلەتیەک دیرۆکی کریە

ئەندامێ مەجلیسا پارتیا جەهەپێ در. عەلی حەیدەر راگهاند: “پارتیەکا کو بەشداری چارەسەرکرنا پرسگرێکا کورد یا ل ڤی وەلاتی نەبە، شانسێ وێ یێ ھاتنا سەر دەستھلاتداریێ تونەیە.”

کۆمسیۆنا پارلەمەنتۆیێ یا ژ بۆ پرۆژەیا “ترکیەیا بێ تەرۆر” ھاتی ئاڤاکرن، ل پارلەمەنتۆیێ جڤینا خوەیا 18ێ ئەنجامدا و بریار دا ھەیەتەک ل سەر ناڤێ کۆمسیۆنێ سەردانا ئیمرالی بکە. لێ جەهەپە تەڤلی جڤینێ نەبوو و ئەو ناخوازن شاندەک ل سەر ناڤێ کۆمسیۆنێ راستەراست سەردانا ئۆجالان بکە. ئەڤ ھەلوەستا جەهەپێ بوو سەدەمەک کو گەلەک ئالیان جەهەپە رەخنە کر.

تێ زانین کو، جەهەپە و دەم د ھلبژارتنێن ھەرێمی دە ھەڤالبەندێن ھەڤبوون و ھەڤکاریەک ب ھێز کربوون.

ھندەک رەخنە د ناڤا جەهەپێ ب خوە دە ژی ل ڤێ بریارا پارتیێ ھاتە کرن. ئەندامێ مەجلیسا پارتیا جەهەپێ در. عەلی حەیدەر فرات داخویانیەک دا و گۆت:

“ئیرادەیا کو ئیرۆ د مەجلیسا مەزن یا نەتەوەیی یا ترکیەیێ دە دەردکەڤە ھۆلێ، لگەل پرەنسیبا ‘جھێ چارەسەرکرنا پرسگرێکا کورد مەجلیسا مەزن یا نەتەوەیی یە’ ل ھەڤ دکە، کو مە ھەتا نھا وەکی پارتی پشتگرییا ڤێ یەکێ کریە و مە گۆتیە جھێ چارەسەریێ مەجلسا مەزن یا نەتەوییە. سەردانا ئیمرالیێ یەک ژ کێلیێن سەرەکی یێن چارەسەریێ یە، ژ بەر کو ھەکە پرسگرێکەک ھەبە، ئەو تەنێ ب رێیا ئالیێن تێکلدار دکارە وەرە چارەسەر کرن. مخابن، سەرۆکاتیا پارتیا مە خەلەتیەک دیرۆکی کریە.”