تۆم باڕاک: مە ب دەستێ خوە ئیراق پێشکێشی ئیرانێ کر
نوونەرێ تایبەتێ ئامەریکایێ یێ بۆ سووریەیێ تۆم باڕاک، پەردە ژ سەر شاشیێن ستراتەژیک یێن وەلاتێ خوە یێن ل ئیراقێ راکر و رەخنەیێن توند ل سیاسەتا رێڤەبەریێن بەرێ یێن کۆشکا سپی گرتن.
باڕاک د ھەڤپەیڤینەکێ دە لگەل رۆژنامەیا “زە نەشنال” راگھاند، سیاسەتا رێڤەبەریا بەرێ یا ئامەریکایێ بوویە سەدەما بھێزبوونا پێگەھا ئیرانێ ل ناڤچەیێ.
باڕاک دەستنیشان کر، چێبوونا “ڤالاھیا دەستھلاتێ” ل ئیراقێ، دەرفەتەکا زێرین دا تەھرانێ و وان ئەو ڤالاھی تژی کرن. دەربارێ سیستەما سیاسی یا ئیراقێ دە ژی، بەرپرسێ ئامەریکی مکور ھات و گۆت: “مە شاشیەکا مەزن کر، کو د ئەنجامێ دە باندۆر و ھەژمۆنا میلیشیایێن نێزیکی ئیرانێ د ناڤ پارلامەنتۆیێ دە زێدەتر بوو.”
نوونەرێ ئامەریکایێ رەوشا نھایا حکوومەتا ئیراقێ وەکی “میناکەکا تێکچوویی” بناڤ کر کو دڤێت ئامەریکا دەرسێ ژێ وەربگرە.
دەربارێ سەرۆکوەزیرێ ئتراقێ محەمەد شیاع سوودانی دە ژی، باڕاک نێرینەکا بالکێش ئانی زمان و گۆت: “سوودانی مرۆڤەکی ژێھاتییە، لێ ت دەستھلاتا وی نینە.”
ھەروھا باڕاک سەدەما ڤێ بێدەستھلاتیا سوودانی ڤەگەراند سەر ھەژمۆنا ھێزێن حەشدا شەعبی و نوونەرێن وان یێن ل پارلامەنتۆیێ و گۆت: “ئەو رێگرن ل پێشیا پرۆسەیا سیاسی و ناھێلن سوودانی چ ھەڤپەیمانیەکا ب باندۆر پێک بینە.”
بەرپرسێ ئامەریکی ب بێھێڤیبوون بەحسا وێ یەکێ کر کو واشنگتۆنێ د ناڤا 20 سالان دە، ب تریلیۆنان دۆلار ل ئیراقێ خەرج کرن، لێ ئەنجام نە باش بوو و نھا “گەلەک زەحمەتە” کو ئەو بکارن وێ پرسگرێکێ چارەسەر بکن.
