ل سووریەیێ ژ بەر سالڤەگەرا نەمانا رەژیما ئەسەد ئاھەنگ تێن کرن
ل سەرانسەرێ سووریەیێ ئاھەنگێن جەماوەری ژ بۆ سالڤەگەرا یەکێ یا نەمانا رەژیما ئەسەد تێن لدارخستن، لێ ل رۆژئاڤایێ کوردستانێ رێڤەبەریا خوەسەر یا باکورێ رۆژھلاتێ سووریەیێ ھەمی چالاکیێن ب ڤێ ھەلکەفتێ قەدەغە کرنە.
ئیرۆ رۆژا دوشەمبێ، 8ێ بەرچلەیا 2025ێ، سالڤەگەرا یەکێ یا نەمانا رەژیما ئەسەدە و سووریەیی ئاھەنگێن خوەشیێ دکن. ئەڤ ژی د دەمەکێ دەیە کو، حکوومەتا نوویا سووریەیێ، ب سەرۆکاتیا ئەحمەد شەرع، بزاڤێ دکە کو ئەنجام و باندۆرێن شەرێ ناڤخوەیی یێ 13 سالان ژ ھۆلێ راکە و پێشیێ ل پارڤەبوونا سووریەیێ بگرە.
تەڤی دەربازبوونا سالەکێ د سەر گوھەرتنا دەستھلاتداریێ رە، لێ حکوومەتا نوویا سووریەیێ رووبروویی گەلەک پرسگرێکێن ئەولەھی و سیاسی بوویە، وەکی بەردەوامبوونا دوبەرەکیێن نەتەوەیی، ل باکورێ رۆژھلاتێ سووریەیێ ھەسەدێ و ھێزێن کوردی لگەل شامێ و ل باشوورێ سووریەیێ ژی داخوازا پێکھاتەیا دورزیان ژ بۆ وەرگرتنا مافێ خوەبرێڤەبرنێ.
ژ بلی شەر و دوبەرەکیێن پێکھاتەیێن نەتەوەیی، دوبەرەکیێن مەزھەبی، ب تایبەتی ژی عەلەویان، ئاستەنگیەکا دنە ل پێشیا ئارامیا سووریەیێ، گەلەک ئاوارەیێن چەند سالێن شەرێ ناڤخوەیی ژی ھەتا نھا ڤەنەگەریانە مالێن خوە.
لێ ل رۆژئاڤایێ کوردستانێ، رێڤەبەریا خوەسەر ھەمی کۆمبوونێن جەماوەری و کرنا ئاھەنگان ب ھەلکەفتا سالڤەگەرا نەمانا رەژیما ئەسەد قەدەغە کرنە، ب ھنجەتا زێدەبوونا تەڤگەرا “شانەیێن تەرۆریست” کو موومکنە ڤێ ھەلکەفتێ ژ بۆ کریار و ئێریشێن تەرۆریستی ب کار بینن.
نەمانا رەژیما ئەسەد و گوھەرتنا دەستھلاتداریێ ل شامێ ب سەرۆکاتیا ئەحمەد شەرع ھەژمۆنا سیاسی یا دەرڤە یا سووریەیا نوو ب ئاوایەکی بنگەھین گوھەرت، د ناڤ دە داوی ل ھەژمۆنا ئیرانێ ئانی و دەستھلاتا لەشکەری و سیاسی یا بەرفرەھا رووسیایێ ژی ھەتا رادەیا نەمانێ کێم کر. بەرەڤاژی ژی، ھەژمۆنا ترکیێ، ئامەریکا و وەلاتێن کەنداڤی دەست پێ کر.
پشتی سالەکێ ژ گوھەرتنا دەستھلاتداری و پەرگالا سیاسی ل سووریەیێ، حکوومەتا شەرع تەنێ کاریە ھندەک ژ سزا و دۆرپێچێن کو ژ ھێلا وەلاتێن رۆژئاڤایی ڤە ل سەر شامێ ھاتنە سەپاندن سڤک بکە.
