ئەردۆگان: پێڤاژۆیا ئاشتیێ ب لەز پێشڤە دچە

سەرۆککۆمارێ ترکیەیێ ئاماژە دا کو، ژ بەر دەستپێکرنا پێڤاژۆیا ئاشتیێ، تەناھی ژ بۆ دەڤەرێن باکورێ کوردستانێ ڤەگەریایە.

سەرۆککۆمارێ ترکیەیێ رەجەب تەییب ئەردۆگان دوھی رۆژا یەکشەمبێ، 14/12/2025ێ، د ھەڤدیتنەکێ دە لگەل جوانێن وەلاتێ خوە ئاخڤی و ل سەر پێڤاژۆیا ئاشتیێ راگھاند کو، ب سالانە باکورێ کوردستانێ تووشی شەر و ئالۆزیان بوویە. ھەروەسا گۆت: “ئەڤ ئالۆزی ھەتا رادەیەکێ بەلاڤ بوونە کو جوانێن مە نەدکاری ل زانینگەھێن مە د ژینگەھەکا ساخلەم دە بخوینن.”

سەرۆککۆمارێ ترکیەیێ رۆن ژی کر: “مە ل ڤان دەڤەران گەلەک کەس وندا کرن، ژ بەر ڤێ یەکێ مە بریار دا کو ئەم داویێ ل وێ بینن و ژ بۆ بداویکرنا شەر و ئالۆزیان ب لەز پێنگاڤان باڤێژن. دبە کو نھا ل ڤان دەڤەران چەند شکەفت مابن.”

ئەردۆگان ئاماژە ژی دا: “پارلامەنتۆیێ بەرپرسیاریا خوەیا د دەربارێ پێڤاژۆیا ئاشتیێ دە ھلگرتیە و مە بزاڤێن خوە ژ بۆ وێ پێڤاژۆیێ بلەزتر کرنە و چەک ژی ھاتنە شەوتاندن و ئەم پشتراستن کو ئێدی خەلک دێ ل ڤان دەڤەران ب ئازادی بگەرە.”

ئەندامێ کۆنسەیا رێڤەبەرا کۆما جڤاکێن کوردستانێ (کەجەکێ) سەبری ئۆک ل رۆژا یەکشەمبێ 26ێ جۆتمەھا 2025ێ، ل قونتارا چیایێ قەندیلی ب تەڤلیبوونا 25 چەکداران د کۆنفەرانسەکا رۆژنامەڤانی دە پێنگاڤەکا کریارکی یا نوویا پارتیا خوە ل سەر پێڤاژۆیا ئاشتیێیا نوو ل باکورێ کوردستانێ و ترکیەیێ راگھاند.