بالیۆزێ ئیرانێ: گرووپێن چەکدار یێن ئیراقێ سەربخوە نە و نە د بن فەرمانێن مە دە نە

بالیۆزێ ئیرانێ یێ ل بەغدایێ محەمەد کازم سادق راگھاند، ئالیێن سیاسی و گرووپێن چەکدار یێن ل ئیراقێ ب سەرێ خوە بریارێن خوە ددن و د بن فەرمانێن ئیرانێ دە کار ناکن.

محەمەد کازم سادق د داخویانیەکێ دە دیار کر، ھێزێن ئیراقی گھیشتنە ئاستەکە وەھایا “پێگەھشتنا سیاسی” کو دکارن سەربخوە بریار بدن و ل گۆری گەشەدانان گاڤان بھاڤێژن. لێ بەلێ، سادق بال کشاند سەر مژارەکە ھەستیار و گۆت: “گرووپێن ل ئیراقێ ژ بەر بەرتەک و ئەنجامێن ئەگەرا دەستپێکرنا پرۆسەیا بێچەککرنێ نیگەرانن.”

فشارا ئامەریکایێ و داخوازا مارکۆ روبیۆ

ئەڤ داخویانیا بالیۆزێ ئیرانێ د دەمەکێ دە تێ، ئامەریکایێ گوشارێن خوەیێن ل سەر حکوومەتا بەغدایێ ژ بۆ کۆنترۆلکرنا گرووپێن چەکدار زێدە کرنە. د 21ێ مەھا بۆری دە، ئالیکارێ بەردەڤکێ وەزارەتا دەرڤەیا ئامەریکایێ تۆمی پیگۆت ئەشکەرە کربوو کو وەزیرێ دەرڤە مارکۆ روبیۆ ب تەلەفۆنێ لگەل سەرۆکوەزیرێ ئیراقێ محەمەد شیاع سوودانی پەیڤییە.

د وێ پەیوەندیێ دە، روبۆ تەکەزی ل سەر بێچەککرنا گرووپێن چەکدار کربوو و ژ سوودانی رە راگھاندبوو: “ئەڤ گرووپ سەروەریا ئیراقێ لاواز دکن و ل سەر ژیانا وەلاتیان و بازرگانێن ئامەریکی و ئیراقی مەترسی نە. ژ بەر وێ، دڤێت داوی ل رۆلا ڤان گرووپان بێ ئانین و ب چ ئاوایی نەبن بەشەک ژ حکوومەتا نوو یا ئیراقێ.”