د خوەنیشاندانەکێ دە ل ملازقییێ 3 کەس ھاتن کوشتن و ب دەھان کەس ژی بریندار بوون
ل پارێزگەھا لازقییێ و چەند دەڤەرێن دن یێن سووریەیێ، کو پرانیا وان عەلەوی نە، خوەنیشاندانەکا مەزن ھات لدارخستن. ل گۆری راپۆرتێن دەستپێکێ، ژ بەر گولەباران و پەڤچوونان سێ کەس ھاتن کوشتن و زێدەتری 60 کەسێن دن ژی بریندار بوون.
ب ھەزاران وەلاتیێن عەلەوی ل مەیدانا ئەزھەرێ یا باژارێ لازقییێ کۆم بوون و داخوازا گوھەرتنا سیستەما سیاسی یا سووریەیێ ژ بۆ “سیستەمەکا نەناڤەندی و فەدەرال” کر. ھەروەسا داخوازەکا وان یا سەرەکی ژی بەردانا ب ھەزاران گرتیێن عەلەوی بوو، کو نھا د گرتیگەھان دە نە. ژ بلی لازقییێ، باژارێن تەرتووس، حومس (تاخا وادی زەھابێ)، بانیاس و گوندێن حەمایێ ژی خوەنیشاندان ل دار خستن.
رەوانگەھا سووریەیی یا مافێن مرۆڤان راگھاند کو، دو جوانێن عەلەوی ژ ئالیێ ھێزێن ئەولەھیێ یێن حکوومەتا دەمکی یا سووریەیێ ڤە ھاتنە کوشتن.
ژ ئالیەکێ دن ڤە ژی، وەزارەتا ناڤخوەیا سووریەیێ راگھاند کو ئەندامەکێ ھێزێن ئەولەھیا ناڤخوەیی ھاتیە کوشتن و چەند ئەندامێن دن ژی بریندار بوونە. ل گۆری گۆتنا وان، ئەو د دەما “ئەرکا پاراستنا ئەولەھیا خوەنیشاندەران” دە ھاتنە ئارمانجکرن.
رەوانگەھا سووریەیی ئاماژە ژی دا کو، تەرمێ زارۆکەکی، کو ژ رۆژا شەمبیێ ڤە وندا بوو، د ئاڤاھیەکێ د بن ئاڤاکرنێ دە ل باژارێ عەفرینێ ھاتیە دیتن.
رەوشا دەڤەرێ پر ئالۆز بوویە و ئالی ھەڤدو تۆمەتبار دکن:
ئەنجوومەنا ئیسلامی یا عەلەویان راگھاند: خوەنیشاندان ئاشتیانە بوون، لێ “دەستھلاتداران” (ھێزێن ئەولەھیێ) گولە ل دژی سڤیلان ب کار ئانین و ل باژارێ بانیاسێ ژی ئێریشی خوەنیشاندەران ھات کرن.
مەدیایا دەولەتێ ژی ژ ئالیێ خوە ڤە سەدەما توندووتووژیان ب ئێریشێن “بەرماھیێن رەژیما بەرێ” ڤە گرێ دا، کو ل گۆری گۆتنا وان، ئێریشی ھێزێن ئەولەھیێ و وەلاتیان کریە.
ژ ئالیەکێ دن ڤە ژی، حکوومەتا سووریەیێ تەکەز کر کو؛ ھێزێن وان ژ بۆ پاراستنا ئەولەھیێ ل وێ دەرێ بوون و بوونە قوربانیێن کریارێن توندووتووژیێ.
ئەڤ خوەنیشاندان نەرازیبوونێن زێدە ل دەڤەرێن کو بەرێ وەکی بنگەھا سەرەکی یا پشتگریا رەژیمێ دھاتن حەسباندن نیشان ددن، و داخوازێن ژ بۆ فەدەرالیزمێ ئالیەکێ نوو ددن ئالۆزیێن سووریەیێ.
