ل ترکیێ د ئۆپەراسیۆنا ل دژی داعشێ دە 3 پۆلیس ھاتن کوشتن

د ئۆپەراسیۆنا ل دژی داعشێ دە د ناڤبەرا پۆلیسێن ترک و ئەندامێن داعشێ دە شەر و پەڤچوون دەرکەت و 3 پۆلیس ھاتن کوشتن، 8 پۆلیس و پاسەوانەک ژی بریندار بوون. ھات راگەھاندن 6 ئەندامێن رێخستنا تەرۆریستی یا داعشێ ژی ھاتن کوشتن.

بوویەر شەڤا بۆری دەمژمێر 2:00ێ پێکھات و ل تاخا عیسمەتپاشا ئۆپەراسیۆن ل دژی مالەکێ پێکھات و شەر و پەڤچوون دەرکەت.

د ئەنجامێ دە 3 پۆلیس ھاتن کوشتن و 8 پۆلیس و پاسەوانەک ژی بریندار بوون.

دەربارێ بوویەرێ دە وەزیرێ ناڤخوە یێ ترکیێ عەلی یەرلیککایا راگەھاند؛ پۆلیسێن مە ئیلکەر پەھلەڤان، تورگوت کولونک و یاسین کۆچیگت د ئۆپەراسیۆنێ دە هاتنە کوشتن و ئەم ژ خوەدێ داخواز دکن، رەحما خوە ل وان بکە و سەرێ مالبات و سازیا ئەولەھیێ ساخبە.

ھەروەھا راگەھاند، د بوویەرێ دە 6 ئەندامێن رێخستنا تەرۆریست ژی ھاتنە کوشتن و راگەھاند؛ ئەندامێن رێخستنا تەرۆریست یێن داعشێ یێن ھاتنە کوشتن ھەموەلاتیێن ترکیێ نە.

وەزیرێ ناڤخوەیێ ترکیێ گۆت؛ ئۆپەراسیۆنا دەمژمێر 2:00ێ دەستپێکر، ھەتا سەرێ سبەھێ دەمژمێر 9:40ێ بەردەوام کریە و تەمام بوویە و گۆت، 5 ژن و 6 زارۆکێن ل ھەمان جهی بوون، ژ مالێ ھاتنە دەرخستن.