ڤەنزوێلایێ، ئامەریکا ژ ئێریشا سەر وەلاتێ خوە تۆمەتبار کر و رەوشا ئاوارتە راگەھاند

بەرپرسێن ڤەنەزوێلایێ دبێژن کو، ئامەریکایێ ئێریش کریە سەر وەلاتێ وان و ب مووشەکان جھێن سڤیل و ژێرخانەیێن ئەنەرژی و لەشکەری کرنە ئارمانج.

سەرۆکێ ڤەنەزوێلایێ نیکۆلاس مادورۆ ئیرۆ 3/1/2026ێ راگھاند: “ب مووشەکان ئێریشی سەر کاراکاسا پایتەختێ وەلاتێ مە تێ کرن.”

سەرۆکێ ڤەنەزوێلایێ ژ بەر وێ ئێریشا کو ل سەر وەلاتێ وی ھاتیە کرن داخوازا جڤینەکا بلەز یا ئەنجوومەنا ئەولەھیێ یا ناڤنەتەوەیی کر.

ھەروەھا وەزیرێ دەرڤەیێ ڤەنەزوێلایێ ئیڤان گل ژی ل سەر ئێریشێن ڤێ داویێ یێن کو ل سەر کاراکاسا پایتەختێ وەلاتێ وان ھاتنە کرن راگھاندنەک بەلاڤ کر.

وەزیرێ دەرڤە یێ ڤەنەزوێلایێ ئەو کریار وەکی “دەستدرێژیا ل سەر وەلات” بناڤ کر و تەکەز کر: “ھەر بزاڤەکا ژ بۆ گوھەرتنا سیستەما برێڤەبریێ ل وەلاتێ مە دێ بێ شکاندن، مینا کو چاوا ھەمی بزاڤێن بەرێ ب سەر نەکەتن.”

ئیڤان گل راستەراست ئامەریکا ب وێ یەکێ تاوانبار کر کو ل پشت وان ئێریشانە، کو تاخێن ئاکنجیبوونێ و ژێرخانەیا ئابۆری کرنە ئارمانج. ھەروەسا ئەو ئێریش وەکی بنپێکرنەکا ئەشکەرە یا پەیماننامەیێن نەتەوەیێن یەکگرتی و گەف ل سەر ئاشتی و تەناھیا ناڤنەتەوەیی وەسف کر.

ناڤبری ھەروەسا گۆت: “وان ئێریشان جھێن سڤیل و لەشکەری کرنە ئارمانج، د ناڤ وان دە ژی ناڤەندا باژارێ کاراکاسا پایتەخت.”

وەزیرێ دەرڤەیێ ڤەنەزوێلایێ ئەشکەرە ژی کر: “سەرۆکێ ڤەنەزوێلایێ نیکۆلاس مادورۆ وەکی بەرسڤەک ژ بۆ وان پێکھاتنان دو بریارێن گرینگ دانە؛ ئاکتیڤکرنا “پلانا بەرەڤانیا نەتەوەیی” و راگھاندنا رەوشا ئاوارتە ل سەرانسەری وەلات.”

ئیڤان گل تەکەز ژی کر کو، ڤەنەزوێلایێ مافێ تەڤاھی ھەیە کو بەرەڤانیەکا رەوا ژ گەل، ئاخ، سەروەری و سەرخوەبوونا خوە بکە.

ئەڤ د دەمەکێ دەیە کو، سەرێ سبەھا ئیرۆ (ب دەما ھەولێرێ) دەنگێ چەند تەقینێن بھێز ل چەند جھێن جودا جودا ل کاراکاسا پایتەختێ ڤەنەزوەلایێ ھات بھیستن و دوومان ل ئاسمانێ وی باژاری بلند بوو.