باخچەلی: ئەم دێ بۆ بسەرخستنا پێڤاژۆیا ئاشتیێ بەردەوام بن

سەرۆکێ پارتیا تەڤگەرا نەتەوەیی یا ترکیەیێ (مەھەپێ) راگھاند: “ل دەمەکا نێزیک ترکیەیەکا بێ شەر و ئالۆزی پێنگاڤ پێنگاڤ تێ بدەستخستن و بزاڤێن بسەرخستنا پێڤاژۆیا ئاشتیێ دێ بەردەوام بن.”

سەرۆکێ پارتیا تەڤگەرا نەتەوەیی یا ترکیەیێ (مەھەپێ) دەولەت باخچەلی ئیرۆ رۆژا سێشەم، 6/1/2026ێ راگھاند: “ل دەمەکێ نێزیک ترکیەیەکا بێ شەر و ئالۆزی پێنگاڤ پێنگاڤ تێ بدەستخستن. ئەم رێیێ نادن چ کەسەکی کو ڤێ پێڤاژۆیێ تێک بدە. ئەم دێ ب توندی ل دژی وان کەسان راوەستنێن کو ل دەرفەتەکێ دگەرن دا کو ڤێ پێڤاژۆیێ تێک ببن.”

باخچەلی ھەروەسا گۆت: “ئەم ل سەر بدەستخستنا ترکیەیەکا بێ شەر جدی نە و مە ئیرادەیەکا خورت و بێناڤبەر ژ بەرەڤانیکرنا ژ ھەڤگرتن، ھەڤسەنگی و براتیێ ھەیە. ئەم ب ئارامی ل سەر بزاڤێن خوە بەردەوامن، دا کو ئەڤ پێڤاژۆ بگھیژە ئارمانجا خوە.”

ئەندامێ کۆنسەیا رێڤەبەر یا کۆما جڤاکێن کوردستانێ (کەجەکێ) سەبری ئۆک ل رۆژا یەکشەمبێ (26ێ جۆتمەھا 2025ێ) ل قونتارا چیایێ قەندیلی ب تەڤلیبوونا 25 چەکداران د کۆنفەرانسەکا رۆژنامەڤانی دە پێنگاڤەکا کریارکی یا نوویا پارتیا خوە ل سەر پێڤاژۆیا ئاشتیێ یا نوو ل باکورێ کوردستانێ و ترکیەیێ راگھاند.

پارلامەنتۆیا ترکیەیێ ژی ل رۆژا ئینێ (21ێ مژدارا 2025ێ) ب دەنگێن سێ ل سەر پێنجێ یێن تەڤایا ئەندامێن کۆمیسیۆنا ھەڤدەنگیا نەتەوەیی، براتی و دەمۆکراسیێ بریار دا کو سەردانا عەبدوللاھ ئۆجالان ل گراڤا ئیمرالیێ بکن.

د وێ کۆمیسیۆنێ دە، 32 دەنگێن ئەرێ، سێ دەنگێن بێ ئالی و دو دەنگێ نەخێر ھەبوون.