دەم پارتی بۆ دەستهلاتدارێن ترکیەیێ: بەرپرسێن ههسهدێ ڤەخوینن ئەنقەرەیێ
هەڤسەرۆکێن دەم پارتیێ داخواز ژ دەستهلاتدارێن ترکیەیێ دکن کو، بەرپرسێن ههسهدێ ڤەخوینن ئەنقەرەیێ، ل سەر ماسەیەکێ روونن و دانووستاندنان بکن.
هەڤسەرۆکێن پارتیا وەکهەڤی و دەمۆکراسیا گەلان (دەم پارتی) تولای هاتمۆگوڵار و تونجەر باکرهان ئیرۆ (یەکشەم، 11.01.2026) د کۆنفەرانسەکا رۆژنامەڤانی دە ل سەر ئێریشا ئارتێشا عەرەبی یا سووریەیێ ل سەر دو تاخێن کوردان یێن حەلەبێ (ئەشرەفیە و شێخ مەقسوود) ئاخڤین.
هەر دو هەڤسەرۆکێن دەم پارتیێ تەکەز ل سەر پێدڤیاتییا راوەستاندنا ئێریشان کر. وان بانگ ل جڤاکا ناڤنەتەوەیی ژی کر کو ئەرکێ خوەیێ پاراستنا جانێ سڤیلان ب جیهـ بینن.
تونجەر باکرهان گۆت: “ئێریشا ل سەر حەلەبێ دێ راستەراست پێڤاژۆیا چارەسەریێ ل ئەنقەرەیێ تێک ددە؛ ل ڤێ دەرێ نیەتەکا وەسا هەیە. دڤێ هەمی ئالی ڤێ لیستکا خەتەر ببینن. بەرپرسێن ههسهدێ ڤەخوینن ئەنقەرەیێ، ل سەر ماسەیەکێ روونن، باخڤن و ب هەڤ رە ل چارەسەریەکێ بگەرن؛ لێ ئەم دبینن کو هن ئالی ل شوونا ڤێ یەکێ بەردەوام ئالۆزیان دخوازن».
باکرهان هەروەسا رەخنە ل داخویانیێن وەزیرێ دەرڤەیێ ترکیەیێ هاکان فیدان ژی کر و گۆت کو، دیپلۆماسی ب زمانێ گەفان نایێ کرن، بەلکی دیالۆگێ هەوجەداری ب دیالۆگێ هەیە. هەروەسا راگهاند: “ئەڤ زمان د بنگەها خوە دە بزاڤەکە ژ بۆ تەپەسەرکرنا ئیرادەیا ئاشتیێ یا ئیمرالیێ ل سووریەیێ.”
هاتمۆگوڵار: دڤێ هێزێن ناڤنەتەوەیی ل هەمبەر ڤێ تاوانێن بێدەنگ نەمینن
تولای هاتمۆگوڵار ژی ژ ئالیێ خوە ڤە بەرخوەدانا شێخ مەقسوود و ئەشرەفیەیێ وەکی خالەکا وەرچەرخانێ یا گرینگ ژ بۆ پاشەرۆژا دەمۆکراسیێ ل سووریەیێ بناڤ کر. ناڤبری هەروەسا گۆت کو، ئەو ئێریش ژ هێلا «هەیئەت تەحریر شام»ێ و کۆمێن چەکدارێن گرێدایی وێ رێکخستنێ د بن ناڤێ «حکوومەتا دەمکی» دە هاتنە کرن.
هاتمۆگوڵار بانگ ل هێزێن هەڤپەیمانیا ناڤنەتەوەیی و وەلاتێن گارانتیکەر کر و گۆت: “بێدەنگبوون هەڤپاربوونا د ڤێ تاوانێن دەیە. نابە رێ بێ دان کو حەلەب ببە مینا غەززەیێ. ئارمانجا ڤان ئێریشان دۆرپێچکرنا گەلێ کورد ل سووریەیێ یە. ئەڤ کریار ل دژی لۆژیکا سووریەیێ و ئیرادەیا پێکڤەژیانا گەلانە.”
ناڤبری تەکەز ژی کر کو، دڤێ ترکیە پشتگریێ بدە دیالۆگێ، نە پەڤچوونێن ل سووریەیێ. هەروەسا داخواز کر کو، ئاگربەستا راگهاندی ل حەلەبێ ببە ئاگربەستەکا هەردەمی.
پەڤچوونێن ڤێ داویێ یێن د ناڤبەرا هێزێن ئەولەکاریا ناڤخوەیی یا گرێدایی رێڤەبەریا خوەسەر و هێزێن حکوومەتا سووریەیێ دە ل تاخێن شێخ مەقسوود و ئەشرەفیەیێ بوو سەدەما کوشتنا ب دەهان سڤیلان و ئاوارەبوونێ زێدەتر ژ 155 هەزار کەسان.
