حەلەب یەک ژ باژارێن ھەری کەڤن یێن جیھانێیە کو ب بەردەوامی ئاڤەدان بوویە. ھەبوونا کوردان ل ڤر ب قاسی دیرۆکا باژێر کەڤنە. د سەر دەمێن کەڤنار دە، حەلەب د بن کۆنترۆلا شارستانییا ھیتیتی و میتانییان دە بوو. وەکی دن، باژارێ حەلەبێ پایتەختا دو دەولەتێن کوردان بوو: یا ئەیووبی و مەھدووھییان.
و نھا، کورد ب گرانی ل دو تاخان ل باژارێ کو بەرێ پایتەختا وان بوون دژین ئەوژی تاخێن، شێخ مەقسوود و ئەشرەفیە نە.
و نھا ل سەر کوردان تێ سەپاندن کو ڤان ھەر دو تاخان بتەرکینن.
ل گۆری پرۆژەیا دەولەتا ترکیێ، پەیمانەک ھاتە چێکرن کو رێڤەبەریا رۆژئاڤا، قسد و تەڤگەرا رێخستنکری یا کورد ژ رۆژئاڤایێ فراتێ وەرە دەرخستن. د جڤینا پاریسێ دە دەستوور ھاتە دایین کو ئەڤ پەیمان ژ ھێلا ئەحمەد شەرع ڤە وەرە بجیھانین. ئیسرایلێ گرێن کو دخوەست ل قونەیترایێ بگرە گرتن و ل سەر رەوشا کوردان بێدەنگ ما. بێ گومان دەرخستنا کوردان ژ ڤێ ھەڤکێشەیا سییاسی نیشانەک خرابە. لێ نە داویا ھەر تشتییە. یا گرینگ ئەوە کو مرۆڤ بکاربە ل رەقا، دێرا زۆرێ و حەسەکێ خوە بگرە. لێ دڤێت مرۆڤ ل ڤێ پێڤاژۆیێ بنێرە کا کی دکاریبوو ژ بۆ رۆژئاڤا چ بکە.
ئەڤ ھەر دو تاخ، کو ب تەڤاھی نفووسا وان ژ 400 ھەزاران زێدەترە، ژ 7ێ چلە ڤە د بن ئێریشا ئارتێشا عەرەبی یا سووریێ دەیە. و نیڤێ نفووسێ ئەڤ هەر دو تاخ تەرکاندینە. لێ رێژەکا مەزن یا سڤیلان ل مالێن خوە مانە و بەرخوە ددن. جوانێن کورد ژ بۆ پاراستنا ڤان تاخان بەرخوەدانەک مەزن نیشان دان.
ژ ھەولێرێ ھەتا جزیرا بۆتان، ژ بۆچومێ ھەتا ستۆکھۆلمێ، کورد ل ھەر دەڤەرێ کو لێ نە، ب رەنگ و گۆتنێن کوردی ژ بۆ شێخ مەقسوود و ئەشرەفیێ رابوون سەر پیان.
سەرۆک بارزانی، ب کارئانینا تێکلیێن خوەیێن ناڤنەتەوەیی و گرانیا خوە یا سیاسی، ژ بۆ حەلەبێ تەدبیر گرت دا کو رێ ل بەر کۆمکوژییێ بگرە، کارەساتێ ئاستەنگ بکە و ژ بۆ ھێزێن کورد دەمی قەزەنج بکە. وی بانگ ل ترکیە، حکوومەتا دەمکی یا سووریێ، ئەمەریکا و ھەمی ئالیێن خویا و نەدیتی کر کو د ناڤبەرا رێڤەبەریا خوەسەر یا رۆژئاڤا و حکوومەتا سووریێ دە دیالۆگێ ساز بکن. سەرۆک ھەول دا کو بنگەھەک ژ بۆ دیالۆگێ د ناڤبەرا ئالیان دە بافرینە.
لێبەلێ، رێڤەبەریا کەجەکێ داخویانیەک نیڤ-رووپەلی یا سەرانسەری وەشاند. د داخویانیێ دە وھا ھات گۆتن، “مە بانگ ل دەولەتا ترکیێ کر کو پشتگری و ھەمبێزکرنا کوردێن ل سووریێ بکە. ژ بەر کو ئەڤ کوردە خزمێن کوردێن ل ترکیێ نە. چاوا کو ترکیە پشتگریێ ددە ترکمەنان، دڤێت پشتگریێ بدە کوردان ژی.” بکارئانینا پەیڤا “کوردێن ل ترکیێ” ژ ھێلا کەجەکێ ڤە ل شوونا “باکورێ کوردستانێ” بوویەرەک پر بالکێشە. ئەڤ یەک نیشان ددە کو دەولەتا ترکیێ لگەل کوردێن ل ترکیێ ئاشتی کریە، و ژ بەر ڤێ یەکێ ھەوجەیە کو لگەل یێن ل سووریێ ژی ئاشتیێ بکە. داخویانیا کەجەکێ نیشان ددە کو رۆژئاڤا نە د رۆژەڤا پەکەکێ دایە. یان ژی دبە کو فەرمانەک ژ ئیمرالیێ بۆ پەکەکێ ھاتبە کو ئەو ل دژی ڤێ ئێرشا دەولەتا سووریێ یا ل سەر کوردێن حەلەبێ دەرنەکەڤن.
سەرۆکێ یەنەکێ بافل تالابانی، ژ بۆ کو ئیماژێ خوە یێ نەباش ژ ھۆلێ راکە و بالکێشتر خویا بکە، داخویانیەک دا کو رایا گشتی کێفخوەش بکە و گۆت، “ئەم دکارین ھێزان بشینن.” بێ گومان، ئەو باش دزانە کو مەجالێ ڤێ پێشنییارێ نینە. یەنەکێ رەوش ڤەگوھەراندیە شۆیا مەدیایی.
گاڤا ئەم ژ جەپھێ کوردان لێدنێرین، ئەم دبینن کو ھەم تاخێن کوردان یێن ل حەلەبێ و ھەم ژی ب گشتی مەسەلەیا رۆژئاڤا ل سەر ملێ سەرۆک بارزانی و رێڤەبەریا ھەسەدێ یە.
بێ گومان، تشتێ گرینگ ئەوە کو رێڤەبەریا رۆژئاڤا خوە ژ شاشیێن کو د 13 سالێن بۆری دە کرنە، دوور بکە. کادرۆیێن پەکەکێ یێن ل رۆژئاڤا دڤێ ل دژی بەرنامەیا ئۆجالان یا رێڤەبرنا رۆژئاڤا ژ ئیمرالی و ترکیێ دەرکەڤن. ھەر چەند ئەو ئۆجالان رەد نەکن ژی، دڤێت ئەو ب کێمانی وی وەکی رێبەرەکی مەعنەوی و سەمبۆلیک قەبوول بکن و ل سەر پێشەرۆژا خوە ئەو ب خوە بریاردەر بن. دڤێت ئەو پۆلیتیکایێن خوە ل گۆری بەرژەوەندیێن رۆژئاڤا دیار بکن، نە ل گۆری بەرژەوەندیێن پەکەکێ لگەل وەلاتێن ھەرێمی. یانی، رۆژئاڤا نە ھەوجەیی پەیڤێن ئایدۆلۆژیک، ئایدەۆلۆژیێن ماجەراپەرەست، یان ژی ھناردەکرنا رامان و ئازادیێ بۆ تەڤاھیا رۆژھلاتا ناڤینە. دڤێت ئەو ل سەر رۆژئاڤا و کوردستانێ گۆتارا خوە ئاڤا بکن.
