نەتەوەیێن یەکگرتی: 190 هەزار کەس ژ حهلهبێ ئاوارە بوونە
ل گەل راگهاندنا ئامارا ئاوارەبوونا 190 هەزار وەلاتیان ژ باژارێ حهلهبێ ژ بەر سەرهلدانا ئالۆزیان؛ نەتەوەیێن یەکگرتی بانگ ل ئالیان دکە کو، بلەز رێیەکا ئەولە ژ بۆ دەرکەفتنا وەلاتیان ڤەکن و جانێ سڤیلان بپارێزن.
بەردەڤکێ سەکرەتەرێ گشتییێ نەتەوەیێن یەکگرتی ستێڤان دوژاڕیك نیگەرانیا خوە ل سەر رەوشا باژارێ حهلهبێ ئانی زمان و راگهاند کو، ژ بەر شەر و ئالۆزیان رەوشەکا مرۆڤی یا دژوار چێ بوویە.
ستێڤان دوژاڕیك د کۆنفەرانسەکا رۆژنامەڤانی دە ئەشکەرە کر: ئەم رەوشا حهلهبێ ژ نێز ڤە دشۆپینن و ئەم ب هەمی ئالیێن پەیوەندیدار رە د تێکلیێ دەنە. ل گۆری راپۆرتان، گەلەک قوربانی و بریندار ل وی باژاری هەنە و پێدڤیتیەکا بلەز ژ بۆ پاراستنا سڤیلان و ژێرخانەیا وی باژاری هەیە.
ناڤبری د دەرهەقا ئامارا ئاوارەیان دە ژی گۆت: هەڤپارێن مە ئەم هایدار کرنە کو، نێزیکی 190 هەزار کەسان ژ بەر سەرهلدانا ئالۆزیان ل حهلهبێ ئاوارە بوونە، نها ژی کۆمیسیۆنا بلندا پەنابەران (UNHCR) و هەڤپارێن وێ ئالیکاریان ل سەر وان کەسان بەلاڤ دکن.
بەردەڤکێ سەکرەتەرێ گشتییێ نەتەوەیێن یەکگرتی ل داویێ ژی بانگ ل هەمی ئالیان کر کو ئەولەهیا سڤیلان بپارێزن و تەکەز کر: «دڤێ رێکارێن بلەز ژ بۆ ڤەکرنا رێیەکا ئەولە ژ بۆ وان کەسێن کو دخوازن ژ وێ دەڤەرێ دەرکەڤن بێن بجهانین.»
