بوویەرێن ل ئەشرەفیێ و شێخ مەقسوودێ د ھەفتەیا بۆری دە د دلێ ھەموو کوردان دە بوونە ئێش و برینەکە مەزن. 300 ھەزار کەس کۆچبەر بوونە، خانی وێران بوونە، ب دەھان کەس دیل ھاتنە گرتن، و ھەژمارەکا نەدیار، لێ تێ تەخمینکرن کو نێزیکی 200 کەسانە، ژ شەرڤان و سڤیلان شەھید بوونە. ئەو شەھید تاجێن سەرێ کوردن. لێ مەسەلە ب رێزگرتنا ژ شەھیدان رە ب داوی نابە. دڤێت رەخنە ل وان کەسێن کو بەرپرسیارێ ڤێ پێڤاژۆیێ نە، کو نە تەنێ خەلکێ حەلەبێ، لێ ھەر چار بەشێن کوردستانێ تراوما ب کوردان ژییان کریە، وەرە گرتن. ژ بەر کو ھەم خەلەتیێن لەشکەری و ھەم ژی یێن سیاسی ھەنە.
ھەتا سالا 2024ێ ئەشکەرە بوو کو ئەمەریکا و ھێزێن رۆژئاڤایی ل حەلەبێ رێڤەبەریەکا کوردی ناخوازن. وەکی دن، ئیسرایل، ئەمەریکا و حکوومەتا سووریەیێ ل پاریسێ ل ھەڤ کرن. رێڤەبەریا رۆژئاڤا ئەنجامێن عەفرین و سەرێ کانیێ دیت؛ ئەو دکاریبوون بێیی وێران ببە خوە ڤەکشینن.
ھەکە تو بریارا ڤەکشینێ نکاری بدی، دڤیابوو شەر ل سەرانسەرێ حەلەبێ بەلاڤ بکرا و بچوونا ئالیکاریێ. ئەڤ ژی نەھات کرن. ژ کۆمەک مرۆڤێن ل ور رە ھات گۆتن کو ھەتا مرنێ شەر بکن. و دەرکەت ھۆلێ کو ژ سالا 2012ێ ڤر ڤە، وان ل دەڤەرێن کو ئەو کۆنترۆل دکرن تونەل یان ژی سەنگەرێن رێکووپێک ئاڤا نەکرنە. ژ بەر ڤێ یەکێ، مرۆڤ ئاسێ مان، و ھەتا رێبەرێن مینا شەھید زیاد حەلەب، رێڤەبەرێ ئاساییشێ، نەچار مان کو خوە بدەن کوشتن.
تشتێ کو ل حەلەبێ قەومی دشبھە بوویەرێن ل جزیرێ کو مرۆڤ د دەما شەرێ خەندەکان دە د ژێرزەمینان دە زندی ھاتن شەوتاندن. و د ھەر دو رەوشان دە، ئەو پەکەکە بوو کو ژ مرۆڤان رە گۆت کو ل بەر خوە بدن و دەرنەکەڤن.
ئەو گۆتنا کو “مەجلسا گەل یا شێخ مەقسوود بریار دا کو دەرنەکەڤە” ئەڤ یەک نەراستە. ھەر کەسێ کو ب سیستەما رۆژئاڤا دزانە، دزانە کو بریار ژ ژۆر ڤە تێنە دایین، و مەجلس تەنێ دکارە وان بجیھ بینە. و ئەڤ بریار راستەراست ژ ھێلا سەرۆکاتیا پەکەکێ یا ھلوەشییایی ڤە ھاتیە دایین.
پەکەکێ خوە ھلوەشاندیە، لێ فکرا بکارئانینا ژیان و ئێشێن مرۆڤان وەکی ئاموورەکی پرۆپاگاندایێ و ئاڤاکرنا زرخەک پاراستنێ ل سەر لەشێن جوانێن کورد نەھاتیە ھلوەشاندن.
د سەردانا مەزلووم عەبدی یا شامێ دە د 4ێ چلە دە، ژێ رە ھات گۆتن، “یان دەرکەڤن یان ئەم دێ ئێریشێ بکن.” ژ بەر کو دیت کو پەڤچوون دێ وێرانیەکا مەزن بینە، مەزلووم عەبدی پێشنیار کر کو هەر دو تاخ وەرن ڤالاکرن و ھێزێن ئەولەھیێ بەر ب عەفرینێ ڤە بچن. لێ پەکەکێ ئەڤ پێشنیار قەبوول نەکر.
سەرۆکاتیا پەکەکێ یا ھلوەشیایی دخوەست پەیامەک نەراستەراست ژ بۆ ترکیێ بشینە و بێژە، “ئەم نەقەدیانە، ئەم ھین ژی دکارین شەری بکین.” ژ بۆ ڤێ ئارمانجێ، وان فەرمانا “بەرخوەدانێ” ل شێخ مەقسوود و ئەشرەفیێ دا. ئەندامێن پەکەکێ د بن ناڤێ کۆۆردیناسیۆنا تەڤگەرا ئاپۆیی دە ئەڤ بریار ل سەر مازلووم عەبدی و یێن دن یێن کو دخوەستن ڤەکشن سەپاندن. کەسێن وەکی باھۆز ئەردال، ئالدار خەلیل و مووزەفەر ئایاتا بەشەک ژ ڤێ کۆۆردیناسیۆنێ نە. د ئەنجامێ دە، مازلووم عەبدی و ھەڤکارێن وی نەکارین پێشی ل ڤێ بریارێ بگرن، و ئینسیاتیفا برێڤەبرنا پەڤچوونێ ژ باھۆز ئەردال رە ھات دایین. مەزلووم عەبدی و ئالیگرێن وی د تەڤاھیا پەڤچوونێ دە بێدەنگ مان.
د ئەنجام دە وێرانیەکە مەزن پێکھات و پەکەکە جارەکە دن گەل فیدایی پیلانێن خوەیێن تاری کر.
د دەمەکێ دە کو ل شێخ مەقسوود و ئەشرەفیێ کارەساتەک لەشکەری و سیاسی یا ئەوقاس مەزن ھات کرن، د دەمەکێ دە کو ھێژ شەھید نەسپارتنە ئاخێ. دەمەکێ کو ھێسرێن چاڤێن کوردان ھێژ نەسەکنیبوون، سازیا چاندی یا پەکەکێ ب بێشەرمی سترانەک ل سەر حەلەبێ وەشاند. تشتێ کو حەلەبێ پیدڤی پێ نە سترانەکە، لێ دادگەھەکا گەلە. دڤێت ئەو کەس و سازییێن کو پێشییا گەلێ کورد تەنێ دو رێ دانین یان مرن یان وێرانکاری حەساب بدن. ئەو رێڤەبەری د وژدانا گەلێ کورد دە روورەش و شەرمەزارن.
