ئهحمهد داودئۆغلو: ئەم بنپێکرنا مافێن کوردان ل سووریەیێ قەبوول ناکن
سەرۆکێ گشتییێ پارتیا سبەرۆژێ ئهحمهد داودئۆغلو راگهاند، درێژبوونا پێڤاژۆیا ئاشتیێ یا ل ترکیەیێ رێ ل بەر دەستێوەردانێن بیانی ڤەدکە. تەکەز کر ژی، ئەو ل دژی بنپێکرنا مافێن کوردان یێن ل سووریێ نە.
ئهحمهد داودئۆغلو د جڤینا فراکسیۆنا “یەن یۆل” دە ل سەر گەشەدانێن داوی یێن ل ترکیە و سووریێ ئاخڤی. داودئۆغلو بال کشاند سەر پەیوەندیا ناڤبەرا ئارامیا ناڤخوەیی و پۆلیتیکایا دەرڤە و دیار کر کو نێزیکاتیا ل هەمبەری کوردێن سووریێ باندۆرەکە راستەراست ل سەر پێڤاژۆیا ئاشتیێ یا ل ترکیەیێ دکە.
ئهحمهد داودئۆغلو دەستنیشان کر، وی د دەستپێکێ دە پشتگری دابوو گاڤا دەڤلەت باهچەلی، لێ بەلێ هشیاری دابوو کو ئەڤ پێڤاژۆ نەیێ پاشخستن. داودئۆغلو وها ئاخڤی: “من پشتەڤانیا خوە دیار کربوو، لێ من گۆتبوو پرۆسەیێ درێژ نەکن. هەر کارەکی کو ل ڤێ هەرێمێ درێژ ببە، دەستێوەردانێن دەرەکی لێ زێدە دبن. دڤێ گاڤێن زووتر وەرن ئاڤێتن. “
داودئۆغلو گۆت: “ئەم دبینن کو هنەک ئالی هشیاری ددن ترکیەیێ؛ ت کەس نکارە هشیاریێ بدە مە، لێ د هەمان دەمێ دە ت کەس نکارە برایێن مەیێن کورد ل سووریێ وەکی نەیار (دژمن) ببینە.”
سەرۆکێ پارتیا سبەرۆژێ رەخنە ل وێ هشمەندیێ گرت کو کوردێن سووریێ وەکی مەترسی پێناسە دکە و گۆت: “کورد دپرسن؛ چما ترکیە کوردێن ل سووریێ وەکی گەف دبینە؟ ژ ئالیێ دن ڤە، هنەک ئیدیعا دکن کو ئیسرائیل ل باکورێ سووریێ دەولەتەکێ ئاڤا دکە. ئەڤ نیقاش دبن سەدەم کو پشتەڤانیا گەل بۆ پێڤاژۆیا ئاشتیێ کێم ببە و پارچەبوونا جڤاکی زێدە ببە. ئەم ت جاری قەبوول ناکن کو مافێن کوردان ل سووریێ وەرن بنپێکرن.”
ئهحمهد داودئۆغلو د داویا ئاخافتنا خوە دە بانگ ل حکوومەتێ کر کو پۆلیتیکایەکە زەلالتر و دادپەروەرتر ل هەمبەری کوردێن ل هەرێمێ بمەشینە، دا کو ئاشتیا ناڤخوەیی یا ترکیەیێ نەیێ خەرابکرن.
