ئالایا ئیسرائیلێ ل سووریەیێ یە لێ هوون کوردان ب سیۆنیزمێ تۆهمەتبار دکن

پارلامەنتەرێ دەم پارتیێ سڕی ساکیک گۆت، «د ناڤ ئاخا سووریەیێ دە ئالایا ئیسرائیلێ ل با دبە لێ کورد ب سیۆنیزمێ تێن تۆهمەتبارکرن»

پارلامەنتەرێ دەم پارتیێ سڕی ساکیک دۆهـ د روونشتنا پارلامەنتۆیا ترکیەیێ دە دەربارێ روودانێن داوی یێن ل سووریەیێ ئاخڤی.

سڕی ساکیک بەرسڤا وان ئیدیعایان دا کو دبێژن بەرپرسێن رۆژئاڤایێ کوردستانێ پشتەڤانیێ ژ ئیسرائیلێ وەردگرن.

ساکیک بال کشاند سەر بلندکرنا ئالایا ئیسرائیلێ یا ل گرێن جۆلانێ یێن سووریەیێ و گۆت، “کورد ت جاران نەبوونە خولامێن سیۆنیزمێ.”

ساکیک د دەما ئاخافتنا خوە دە وێنەیەکی گرێن جۆلانێ نیشانی پارلامەنتەران دا و نەرازیبوونا خوە ل هەمبەری تۆهمەتبارکرنا کوردان ئانی زمان:

“پارلامەنتەرێن برێز باش ل ڤی وێنەیی بنێرن. ئەڤ گرێن جۆلانێ یە، ئاخا سووریەیێ یە.ل وێ دەرێ ئالایا ئیسرائیلێ ل با دبە.یێن کو کوردان ب سیۆنیزمێ تۆهمەتبار دکن بنێرن، د ئالایا سیۆنیزمێ ل وێ دەرێ تێ بلندکرن و ل پاریسێ ل گەل ئیسرائیلێ پەیمان تێن ئیمزەکرن و ئێرشی دو تاخێن کوردان تێن کرن، دیارە کا کی خولامێن ئیسرائیلێ نە.”