شارەزایێن ناڤنەتەوەیی بۆ نهتهوێن یهكبوویی: خەتەرا جینۆسایدێ ل سەر کوردێن سووریێ هەیە
هەژمارەکا شارەزایێن قانوونا ناڤنەتەوەیی، چالاکڤانێن مافێن مرۆڤان و ئاکادەمیسیەنێن جیهانێ د یاداشتنامەیەکا لەزگین دە ژ بۆ سەکرەتەرێ گشتییێ نەتەوەیێن یەکگرتی و ئەنجوومەنا ئەولەهیێ هایداریەکا توند ل سەر ئحتیمالا قڕکرنا نەژادی و جینۆسایدێ ل باکور و رۆژهلاتێ سووریەیێ دا.
د وێ یاداشتنامەیێ دە، کو ل رۆژا 21.01.2026ێ پێشکێشی جڤاکا ناڤنەتەوەیی هاتیە کرن، ئیمزەکەران نیگەرانییا خوە یا زێدە ل سەر وان ئێریش و پێشهاتێن لەشکەری دیار كرنه کو ل سەر دەڤەرێن کوردان تێن کرن.
د پارەکا وێ یاداشتنامەیێ دە هاتیە: ئەو ئێریش نە تەنێ پەڤچوونێن ئاسایینە، بەلکی بنپێکرنێن سیستەماتیک و بەرفرەهن کو تاوانێن شەر و تاوانێن ل دژی مرۆڤاهیێ ڤەدگرن، نهخاسمه ژی کو ژ هێلا ئیدەۆلۆژییا توندرێ یا کۆمێن گرێدایی شامێ ڤە تێن برێڤەبرن.
شارەزا و چالاکڤانان چار داخوازێن لەزگین ژ نەتەوەیێن یەکگرتی کرنە؛ سەپاندنا بریارا راوەستاندنا تاڤلێ یا ئێریشێن ئارتێشا عەرەبی یا سووریەیێ ل سەر سڤیلان و پابەندبوونا تەمام ب قانوونا ناڤنەتەوەیی، دامەزراندنا مەکانیزمەکا لەزگین یا نەتەوەیێن یەکگرتی ژ بۆ بەلگەنامەکرنا بنپێکرنان و دانا زەنگا خەتەرێ یا پێشوەخت، سەرپشککرنا پاراستنا وەلاتیێن کورد و کێمانیێن دن یێن وەکی دورزی، ئێزدی، خرستیان و عەلەویان، و دامەزراندنا دەڤەرەکا تەنا ل باکور و رۆژهلاتێ سووریەیێ ژ بۆ گارانتیکرنا پاراستنا کوردان و پێکهاتەیێن دن ژ خەتەرا نەمانێ.
د وێ یاداشتنامەیێ دە هاتیە، “گەلێ کورد ل باکور و رۆژهلاتێ سووریەیێ د شەرێ ل دژی داعشێ و پاراستنا ئەولەهیا جیهانێ دە بەدەلێن یەکجار مەزن دانە، ژ بەر ڤێ یەکێ نایێ قەبوولکرن کو ئەو نها ژ ئالیێ کۆمێن توندرێ ڤە رووبروویی گەفێن مان و نەمانێ ببن، د دەمەکێ دە کو پێنگاڤێن ناڤنەتەوەیی لاوازن.”
ئەو شارەزا هەروەسا دبێژن: دیرۆک دێ حوکمی بکە، نە ل سەر راگهاندنان، بەلکی ل سەر پێشیگرتنا ل وان کارەساتێن دقەومن و بانگ ل جڤاکا ناڤنەتەوەیی دکن کو بەرپرسیاریێن خوە یێن قانوونی و ئەخلاقی ب جیهـ بینە، بەری کو کارەسات ب تەڤاهی بقەومە.
