وەزیرێ دەرڤەیێ فرانسایێ ل شامێ: رێکەفتنا ھەسەدێ و شامێ مافێن کوردان خورتتر دکە
وەزیرێ دەرڤەیێ فرانسایێ جان-نۆێل باڕۆت پشتی ھەڤدیتنا خوە یا لگەل وەزیرێ دەرڤەیێ سووریەیێ راگھاند، پاریس پشتگریا رێکەفتنا ناڤبەرا ھەسەدێ و شامێ دکە. باڕۆت ھەروھا ئەشکەرە کر کو ئەوێ ئیرۆ ل ھەولێرێ لگەل مەزلووم عەبدی بجڤە.
وەزیرێ دەرڤەیێ فرانسایێ جان-نۆێل باڕۆت، ئیرۆ 5ێ شوباتێ ل شامێ لگەل ھەڤتایێ خوەیێ سووریەیی ئەسعەد شەیبانی جڤیا. باڕۆت پشتی ھەڤدیتنێ د داخویانیەکا چاپەمەنیێ دە رۆناھی خست سەر گرنگیا رێکەفتنا داوی یا د ناڤبەرا ھێزێن سووریەیا دەمۆکراتیک (ھەسەدێ) و حکوومەتا سووریەیێ دە.
وەزیرێ دەرڤەیێ فرانسایێ گۆت: “رێکەفتنا د ناڤبەرا حکوومەت و ھەسەدێ دە، دێ مافێن بنگەھین یێن کوردان خورتتر بکە.” باڕۆت ھەروھا تەکەز کر کو ئەڤ رێکەفتن دێ د شەرێ ل دژی داعشێ دە ژی ببە ئالیکار و ھەولدانێن وان یێن ناڤدەولەتی خورتتر بکە.
جان-نۆێل باڕۆت ئەشکەرە کر ژی، گەرا وی یا دیپلۆماتیک بەردەوام دکە و گۆت: “ئەزێ ئیرۆ ل ھەولێرێ لگەل فەرماندارێ گشتی یێ ھەسەدێ مەزلووم عەبدی بجڤم و ئەم دێ ھوورگلیێن رێکەفتنا ناڤبەرا ھەسەدێ و شامێ دە گۆتووبێژ بکن.”
وەزیرێ دەرڤەیێ فرانسایێ راگھاند، شەرێ ل دژی داعشێ ژ بۆ پاریسێ “پێشینیا ھەری بلند”ە. باڕۆت ھەروھ گۆت:”ئەم دێ ھەر جورە پشتگریا پێویست بدن سووریان، دا کو حکوومەت کاربە ل سەر کارێن خوە بەردەوام بە. فرانسا ل گەل گەلێ سووریەیێ یە،یێ کو ئیرۆ دەرفەتەکا مەزن ب دەست خستیە دا کو پاشەرۆژەکا نوو ئاڤا بکە.”
سەردانا جان-نۆێل باڕۆتا بۆ شامێ بەشەکە ژ گەرا وی یا ل رۆژھلاتا ناڤین، کو تێ دە بریارە پشتی سووریەیێ، سەردانا ئیراق و ھەرێما کوردستانێ ژی بکە.
