هەیئەتا ئیمرالیێ ل سەر هەڤدیتنا ب ئەردۆگان رە داخویانی دا
هەیئەتا ئیمرالیێ یا دەم پارتیێ دۆهـ ب سەرۆککۆمارێ ترکیەیێ رەجەپ تایییپ ئەردۆگان رە جڤیابوو و ئیرۆ داخویانیەک بەلاڤ کر.
د داخویانیێ دە هات راگهاندن کو ژ بۆ بەردەوامکرنا “پێڤاژۆیا ئاشتی و جڤاکا دەمۆکراتیک” ئیرادەیا هەڤپار هاتیە پشتراستکرن.
هەیئەتێ هەر وها ژ بۆ ئاڤێتنا گاڤێن دەمۆکراتیک بانگی پارلامانتۆ و وەزارەتان کر کو “خەباتێن خوە خورت بکن”.
ئەندامێن هەیئەتا ئیمرالیێ یا دەم پارتیێ پەروین بولدان و میتهات سانجار دەربارێ جڤینا خوە یا کریتیکا ب سەرۆککۆمار رەجەپ تایییپ ئەردۆگان رە کو دۆهـ پێک هاتبوو، داخویانیەکە نڤیسکی بەلاڤ کرن.
د جڤینێ دە، باندۆرا بپێشکەتنێن هەرێمی یا ل سەر ترکیەیێ و پێڤاژۆیا دەمۆکراتیکبوونێ هاتن گۆتووبێژکرن.
د داخویانیا کو ب ئیمزەیا پەروین بولدان و میتهات سانجار هاتیە بەلاڤکرن دە، هات دیارکرن کو خالا سەرەکە یا جڤینێ “پێڤاژۆیا ئاشتی و جڤاکا دەمۆکراتیک” بوویە و وها هات گۆتن:
“مە ل گەل برێز سەرۆککۆمار ئەردۆگان ل سەر بپێشکەتنێن ل هەرێما مە و باندۆرا ڤان بپێشکەتنان یا ل سەر ترکیەیێ و پێڤاژۆیا ئاشتی و جڤاکا دەمۆکراتیک شێوری.
د جڤینێ دە، ئیرادەیا هەڤپارا ژ بۆ بەردەوامکرنا پێڤاژۆیێ ب ئاوایەکی ببریار جارەکە دن هات پشتراستکرن.”
هەیئەتێ تەکەز کر کو ژ بۆ بپێشڤەچوونا پێڤاژۆیێ دڤێ سازیێن دەولەتێ رۆلەکە ئاکتیفتر بلیزن.
د داخویانیێ دە هات خوەستن کو پارلامەنتۆیا ترکیەیێ، وەزارەتێن پێوەندیدار و سازیێن دەولەتێ ژ بۆ ئاڤێتنا گاڤێن بەربچاڤ و باوەریپێکەر خەباتێن خوە خورت بکن.
هەیئەتێ د ڤێ چارچۆڤەیێ دە بال کشاند سەر گرینگیا تەمامکرنا راپۆرا کو ژ ئالیێ کۆمیسیۆنا هەڤگرتنا نەتەوەیی، براتی و دەمۆکراسیێ ڤە ب نێرینەکە بەرفرەهـ هاتیە ئامادەکرن.
هەر وها هات دیارکرن کو دڤێ چارچۆڤەیا یاسایی یا دەربارێ دەمۆکراتیکبوون و ئازادیان دە “بێیی دەرەنگی و ب لهەڤکرنەکە هەری بەرفرەهـ” ببە یاسا.
هەیئەتا دەم پارتیێ بال کشاند سەر وێ یەکێ کو سیاسەتا جیهانی و هەرێمی د سەردەمەکە ب تەڤگەر دە دەرباس دبە و دیار کر کو ئەو باوەر دکن ئەڤ جڤینا د ڤێ پێڤاژۆیا کریتیک دە دێ خزمەتا بهەڤرەژیانا ئاشتیانە یا گەلێن ترکیەیێ و هەرێمێ بکە.
ئەندامێن هەیئەتێ ژ بەر قەبوولکرنا وان سپاسیا سەرۆککۆمار ئەردۆگان کر و داخویانیا خوە ب داوی ئانی.
