لیندسی گراھام: مە نەھشت ئارتێشا سووریەیێ دەرباسی دەڤەرێن کوردان ببە
سیناتۆرەکێ کۆماری یێ ئامەریکایێ تەکەز کر کو، ئامەریکایێ پشتا خوە نەدایە کوردان و گۆت: مە رێ ژی ل بەر پێشڤەچوونا ئارتێشا سووریەیێ ژ بۆ سەر دەڤەرێن کوردان گرتیە.
سیناتۆرێ کۆماری یێ ناڤدار لیندسی گراھام د چارچۆڤەیا گەرا 62یێ یا کۆنفەرانسا ئەولەھیێ یا مونشنێ دە ژ چالاکڤانەکا کورد رە راگھاند کو، ئامەریکایێ پشتا خوە نەدایە کوردێن سووریەیێ و رێ ل بەر پێشڤەچوونا ئارتێشا عەرەبی یا سووریەیێ بەر ب کووراھیا دەڤەرێن کوردان ڤە گرتیە.
گراھام، خوەدیێ پرۆژەقانوونا “پاراستنا کوردان” یا ئەنجوومەنا پیران، تەکەز ژی کر کو، ھێزێن سووریەیا دەمۆکراتیک (ھەسەدە) ھەڤالبەندێن سەرەکی یێن ئامەریکایێ د شەرێ ل دژی تەرۆرێ دە نە و دڤێت د سووریەیا نوو دە جھەکێ وان یێ ھێژا ھەبە.
د ڤان دەمێن داویێ دە و تەڤی زێدەبوونا نیگەرانیان ل سەر ئیحتیمالا ئێریشا حکوومەتا نوویا سووریەیێ ژ بۆ سەر کوردان، سیناتۆر گراھام بزاڤێن خوە زێدە کرنە. د داویا چلەیا 2026ێ دە، گراھام ب ھەڤپاری لگەل سیناتۆرێ دەمۆکرات ریچارد بلومێنتھال، پرۆژەقانوونەک ب ناڤێ “قانوونا پاراستنا کوردان” پێشکێشی ئەنجوومەنا پیران کر.
ئارمانجا وێ پرۆژەقانوونێ سەپاندنا سزایێن ئابۆری یێن گرانە ل سەر ھەر ئالی، حکوومەت یان دەزگەھەکا دارایی یا کو ئالیکاریێن لەشکەری بدە شامێ دا کو ئێریشی ھێزێن سووریەیا دەمۆکراتیک (ھەسەدێ) بکە.
گراھام د چەند داخویانیان دە گۆتیە کو، پاشگوھکرنا کوردان پشتی شکاندنا داعشێ دێ “ژ بۆ ئامەریکایێ شەرم بە” و دێ ژ بۆ ئەولەھیا نەتەوەیی یا وەلاتێ وی ژی کارەساتەکا مەزن بە.
ناڤبری ئاماژە ژی دایە کو، ھەسەدێ بارێ ھەری گران یێ شەرێ نەھێلانا داعشێ ب ستوویێ خوە ڤە گرتیە و نابە دەستوور بێ دایین کو ئەو ببن قوربانیێن ھەڤرکیێن سیاسی. وێ پرۆژەقانوونێ پشتگریەکا خورت ژ ھەر دو پارتیێن کۆماری و دەمۆکراتان ل کۆنگرەسێ ب دەست خستیە.
