وەزارەتا بەرەڤانیێ یا سووریەیێ: مە ب ھەڤاھەنگیا ئامەریکایێ بنگەھا لەشکەری یا شەدادیێ وەرگرت

وەزارەتا بەرەڤانیێ یا سووریەیێ ئیرۆ رۆژا یەکشەم، 15ێ شوباتا 2026ێ راگھاند کو، وان ب ھەڤاھەنگیا ئامەریکایێ بنگەھا لەشکەری یا شەدادیێ کۆنترۆل کریە.

وەزارەتا بەرەڤانیێ یا سووریەیێ راگھاند کو، ھێزێن وان بنگەھا لەشکەری یا شەدادیێ ل سینۆرێ پارێزگەھا حەسەکەیێ وەرگرتیە.

ل گۆری راگھاندنا وەزارەتا بەرەڤانیێ یا سووریەیێ، وەرگرتنا وێ بنگەھێ پشتی ھەڤاھەنگیەکا ھەڤپار ب ئالیێ ئامەریکایی رە تێ، کو ئەڤ یەک ژی وەکی پێنگاڤەکا نوو د گوھەرتنێن دەڤەرێ دە تێ حەسباندن.

پشتی ڤەکشینا ھێزێن ئامەریکایی ژ تەنەفێ و ڤەگوھەستنا وان ژ بۆ ناڤ سینۆرێ ئوردنێ، وەزارەتا بەرەڤانیێ یا سووریەیێ راگھاند؛ ب ھەڤاھەنگی لگەل ئالیێ ئامەریکایی، یەکینەیێن ئارتێشا وی وەلاتی تەڤاھیا وێ بنگەھێ و دەردۆرا وێ کۆنترۆل کریە.

د بەردەوامیا وێ داخویانیێ دە ھاتیە گۆتن کو، ئارتێشا عەرەبی یا سووریەیێ ل سەر تەڤاھیا سینۆرێ وەلاتێ خوە لگەل ئوردن و ئیراقێ ل بیابانا تەنەفێ بەلاڤ بوویە.

ھێزێن ئامەریکایێ پێشتر د چارچۆڤەیا ھەڤپەیمانیا ناڤنەتەوەیی یا ل دژی داعشێ دە ل وێ بنگەھێ بنەجھ بووبوون، ل رۆژا چارشەمبێ، 11ێ شوباتا 2026ێ، ب ھەڤاھەنگی لگەل ئارتێشا سووریەیێ و حکوومەتا ئوردنێ، ھێزێن خوە ڤەگوھەستن بنگەھا برجا 22یێ ل ناڤ ئاخا ئوردنێ، کو تەنێ چەند کیلۆمەترەیان دووری تەنەفێیە.

بنگەھا لەشکەری یا تەنەفێ ل سالا 2016ێ ژ ھێلا ھێزێن ئامەریکایی ڤە ل سێکوژیکا سینۆری یا د ناڤبەرا سووریێ، ئیراق و ئوردنێ دە ھاتیە دامەزراندن. ئارمانجا سەرەکی یا ڤێ بنگەھێ شەرێ ل دژی تەرۆریستێن داعشێ و پێشیگرتنا ل بەرفرەھبوونا ھەژمۆنا لەشکەری یا ئالیێن بیانی ل دەڤەرێ بوو.