ئەردۆگان: ئەم پشتگریێ ددن یەککرنا ھێزێن ھەسەدێ د چارچۆڤەیا دەولەتا سووریەیێ دە
سەرۆککۆمارێ ترکیەیێ رەجەب تەییب ئەردۆگان ھەلوەستەکا نوو یا وەلاتێ خوە ل سەر پاشەرۆژا ھێزێن کوردی ل سووریەیێ راگھاند و تەکەز کر کو، ئەنقەرە ب گرینگی ڤە ل پێڤاژۆیا یەککرنا ھێزێن سووریەیا دەمۆکراتیک (ھەسەدێ) د ناڤ دەزگەھێن دەولەتا سووریەیێ دە دنێرە.
سەرۆککۆمارێ ترکیەیێ رەجەب تەییب ئەردۆگان ئیرۆ رۆژا چارشەم، 18ێ شوباتا 2026ێ، د دەما ڤەگەرا خوەیا ژ وەلاتێ ئەسیۆپیایێ دە ژ رۆژنامەڤانان رە راگھاند: ترکیە ژ وان پێنگاڤێن کو ھەتا نھا ژ بۆ یەککرنا ھێزێن کوردی ل سووریەیێ ھاتنە ئاڤێتن رازییە.
سەرۆککۆمارێ ترکیەیێ کێفخوەشیا خوە ژ بۆ پێشکەتنێن د پێڤاژۆیا یەککرنا ھێزێن کوردی د ناڤ دەزگەھێن دەولەتا سووریەیێ دە ئانی زمان. ئەڤ پێشکەتن ژی پشتی وێ پەیمانا ئاگربەستێ چێ بوونە یا کو د داویا مەھا بۆری دە ب ناڤبەینکاری و پشتگریا ویلایەتێن یەکگرتی یێن ئامەریکایێ د ناڤبەرا ئالیان دە ھات ئیمزەکرن.
ئەردۆگان ئاماژە ژی دا کو، وەلاتێ وی پێڤاژۆیا وێ ھەڤگرتنێ ژ نێزیک ڤە دشۆپینە و گۆت: ئەنقەرە رێنمایێن پێدڤی ل سەر چاوانیا بجھانینا وێ پەیمانێ ژ بۆ مسۆگەرکرنا تەناھیێ ل دەڤەرێ ددە.
ژ ئالیەکێ دن ڤە، فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم ئەبدی ل رۆژا سێشەمێ تەکەز ل سەر پێدڤیتیا یەککرنا ھەمی دەزگەھێن “رێڤەبەریا خوەسەر” لگەل پێکھاتە و دەزگەھێن دەولەتا سووریەیێ رە کر.
مەزلووم عەبدی رۆن ژی کر کو، ئەڤ پێنگاڤ نە تەنێ ب پێکھاتەیا کوردان ڤە گرێدایییە، بەلکی ژ بۆ ھەمی پێکھاتەیێن دەڤەرێ پێڤاژۆیەکا تەڤگرە. ئاماژە ژی دا کو، پێکانینا ھەڤگرتنا ب تەڤاھی د وارێن ئیداری و دەزگەھی دە پێڤاژۆیەکا ئالۆزە و دبە کو دەمەکا زێدەتر پێدڤی بە.
ئەڤ گوھەرتنا ھەلوەستا ترکیەیێ و ھەڤفێمکرنێن نوو یێن د ناڤبەرا ئالیان دە وەکی قۆناغەکا نوو د کریزا سووریەیێ و تێکلیێن د ناڤبەرا ھێزێن کوردی و دەولەتا ناڤەندی دە تێ دیتن، کو د بن چاڤدێریا ناڤنەتەوەیی دە تێ مەشاندن.
