ل گۆری رویتەرسێ، وەزیرێ دەرڤەیێ عەرەبستانا سعوودی ھایداری دایە ئیرانییان. ئەشکەرە ژی کریە کو، ئەو ئامادە نە کو ژ بۆ چارەسەرکرنا پرسگرێکا د ناڤبەرا ئامەریکا و ئیرانێ دە ب رێیا دیپلۆماسیێ ناڤبەینکاریێ بکن.
ئەڤ ژی د دەمەکێ دەیە کو، ئیسرایل و ئامەریکایێ ل سەرێ سبەھا رۆژا شەمیێ، 28ێ سباتا 2026ێ، ب ھەڤ رە ئێریشی ئیرانێ کر و گەلەک باژارێن وی وەلاتی بۆمبەباران کرن، و د ئەنجامێ دە رێبەرێ بلندێ کۆمارا ئیسلامی یا ئیرانێ عەلی خامنەیی و گەلەک سەرکردەیێن بلندێن ئیرانێ ھاتن کوشتن.
د بەرسڤا وێ ئێریشێ دە، ئیرانێ ژی ئێریشی وەلاتێ ئیسرایلێ و جھ و بنگەھێن ئامەریکایێ ل چەند وەلاتێن دەڤەرێ کر و ھەتا نھا ژی ئێریشێن ھەر دو ئالیان بەردەوامن و ھەژمارا کوشتی و برینداران و زرارێن مادی بەر ب زێدەبوونێ ڤەیە.
ھەرێما کوردستانێ ژی، و ب تایبەتی ژی باژارێ ھەولێرێ، د ڤێ چارچۆڤەیێ دە چەند جاران کەفتیە بەر ئێریشێن ب مووشەک و درۆنان، لێ ھەمی ئێریشێن ئاسمانی یێن ئیرانێ ژ ئالیێ سیستەما بەرەڤانیا ئاسمانی ڤە ل ھەرێما کوردستانێ ھاتنە شکاندن.
پەیوەندیێن د ناڤبەرا عەرەبستانا سعوودی و ئیرانێ دە، پشتی 7 سالان ژ تێکچوونا دیپلۆماتیک، د ئادارا سالا 2023یێ دە ب ناڤبەینکاریا چینێ ھاتبوون نۆرمالکرن. پێشتر ل سالا 2019، دەزگەھێن پەترۆلێ یێن ئارامکۆ یا سعوودیەیێ راستی ئێریشێن مەزنێن ب درۆن و مووشەکان ھاتبوون، عەرەبستانا سعوودی و دەولەتێن یەکگرتی یێن ئامەریکایێ ئیران ب وان ئێریشان تۆمەتبار کربوو.
