فیدان بۆ ئیراقچی: بنپێکرنا ئاسمانێ ترکیەیێ نایێ قەبوولکرن
وەزیرێ دەرڤەیێ ترکیەیێ ھاکان فیدان د پەیوەندیەکا تەلەفۆنی دە لگەل وەزیرێ دەرڤەیێ ئیرانێ عەباس ئیراقچی ھایداری دا کو، وەلاتێ وی بنپێکرنا ئاسمانێ ترکیەیێ ب تو ئاوایەکی قەبوول ناکە.
ئاژانسا فەرمی یا نووچەیان یا ترکیەیێ ژ چاڤکانیێن وەزارەتا دەرڤە راگھاند کو، ھاکان فیدان د پەیوەندیەکا تەلەفۆنی دە لگەل عەباس ئیراقچی تەکەز ل سەر وێ یەکێ کر کو، ترکیە دێ ل سەر بجھانینا ھەمی رێکارێن پێدڤی ژ بۆ رووبرووبوونا ھەر بنپێکرنەکا کو ل سەر ئاسمانێ وەلاتێ وێ تێ کرن بەردەوام بە.
وەزیرێ دەرڤەیێ ترکیەیێ تەکەز ژی کر کو، دڤێت ھەمی ئالی ژ وان پێنگاڤان دوور بن یێن کو دبن سەدەما تێکدانا ئەولەھیا دەڤەرێ و خەتەرێ ل سەر جانێ سڤیلان.
وەزیرێ دەرڤەیێ ئیرانێ عەباس ئیراقچی ژی راگھاند کو، ئەو مووشەکێن کو بەر ب ئاسمانێ ترکیەیێ ڤە ھاتنە ئاڤێتن ژ ئالیێ ئیرانێ ڤە نەھاتنە ئاڤێتن. ئاماژە ژی دا کو، تەھران لێکۆلینەکا تەڤالی و ھوور ل سەر وێ بوویەرێ دکە.
ئەڤ پەیوەندیا تەلەفۆنی د دەمەکێ دە ھات کرن کو، د چەند رۆژێن بۆری دە ژ بەر شەر و ئالۆزیێن دەڤەرێ ھندەک پارچەیێن مووشەکان ل ناڤ ئاخا ترکیەیێ ژ ئالیێ ناتۆیێ ڤە ھاتن ئێخستن و ترکیەیێ ژی ب رەنگەکی فەرمی سیستەما بەرەڤانیێ یا پاتریۆت ل باژارێ مالاتیایێ بنجھ کر.
ئەڤ ژی د دەمەکێ دەیە کو، ئیسرایل و ئامەریکایێ ل سەرێ سبەھا رۆژا شەمبیێ، 28ێ سباتا 2026ێ، ب ھەڤ رە ئێریشی ئیرانێ کر و گەلەک باژارێن وی وەلاتی بۆمبەباران کرن، و د ئەنجامێ دە رێبەرێ بلندێ کۆمارا ئیسلامی یا ئیرانێ عەلی خامنەیی و گەلەک سەرکردەیێن بلندێن ئیرانێ ھاتن کوشتن.
د بەرسڤا وێ ئێریشێ دە، ئیرانێ ژی ئێریشی وەلاتێ ئیسرایلێ و جھ و بنگەھێن ئامەریکایێ ل چەند وەلاتێن دەڤەرێ کر و ھەتا نھا ژی ئێریشێن ھەر دو ئالیان بەردەوامن و ھەژمارا کوشتی و برینداران و زرارێن مادی بەر ب زێدەبوونێ ڤەیە.
ھەرێما کوردستانێ ژی، و ب تایبەتی ژی باژارێ ھەولێرێ، د ڤێ چارچۆڤەیێ دە چەند جاران کەفتیە بەر ئێریشێن ب مووشەک و درۆنان، لێ پرانیا ئێریشێن ئاسمانییێن ئیرانێ ژ ئالیێ سیستەما بەرەڤانیا ئاسمانی ڤە ل ھەرێما کوردستانێ ھاتنە شکاندن.
