هەفتەیا سێیه‌م یا ئێرشان: 13 سەربازێن ئامەریکی هاتنە کوشتن و ب هەزاران ئیسرائیلی بریندار بوونە

ب دەستپێکرنا هەفتەیا سێیەم یا ئۆپەراسیۆنێن ل دژی ئیرانێ رە، هەژمارا کوشتی و بریندارێن سەربازێن ئامەریکایێ زێدە بوویە. د هەمان دەمێ دە ئیسرائیلێ راگهاند، ژ بەر ئێرشێن ئیران و لبنانێ ب هەزاران کەس بریندار بوونە.

وەزارەتا بەرەڤانیێ یا ئامەریکایێ (پینتاگۆن) پشتراست کر کو ژ دەستپێکا ئۆپەراسیۆنێ ڤە (28ێ سباتێ) هەتا نها 13 سەربازێن وان هاتنە کوشتن.

ل گۆری راپۆرێ، 7 سەرباز د ئەنجاما ئێرشێن مووشەکی یێن ئیرانێ دە ل سەر بارەگەهێن ئامەریکایێ هاتنە کوشتن، 6 سەرباز ژی د ئەنجاما کەتنا فرۆکەیەکە لەشکەری دە ل ئیراقێ جانێ خوە ژ دەست دانە.

فەرمانداریا ناڤەندی یا ئامەریکایێ (سێنتكۆم) راگهاند، هەژمارا سەربازێن وان یێن بریندار گهیشتیە 200 کەسان. هات دیارکرن کو رەوشا 10 سەربازان گرانە. ئەڤ برینداربوون د بارەگەهێن ئامەریکایێ یێن ل (بەحرەین، ئیراق، ئوردن، کوێت، ئەرەبستانا سعوودی، ئیمارات و ئیسرائیلێ) دە هاتنە تۆمارکرن.

ل ئیسرائیلێ بیلانچۆ گران دبە

دەزگەهێن هەوارچوونێ یێن ئیسرائیلێ راگهاندن، 12 کەس هاتنە کوشتن؛ 9 ژ وان د ئەنجاما ئێرشەکە مووشەکی یا ئیرانێ دە ل دەڤەرا “بەعت شەمەش” یا نێزیکی قودسێ جانێ خوە ژ دەست دانە. هەر وها ئارتێشا ئیسرائیلێ کوشتنا دو سەربازێن خوە د شەرێ ل باشوورێ لبنانێ دە پشتراست کر.

وەزارەتا تەندورستیێ یا ئیسرائیلێ ژی بەلاڤ کر، ژ دەستپێکا شەر ڤە 3 هەزار و 530 بریندار راکرنە نەخوەشخانەیان، تەنێ د 24 ساعەتێن داوی دە 142 کەس بریندار بوونە، رەوشا 8 برینداران نە جیگرە.

چاڤدێرێن سیاسی بالێ دکشینن سەر وێ یەکێ کو ئیسرائیل “سانسوورەکە توندا لەشکەری” بکار تینە و زیانێن خوەیێن راستی ڤەدشێرە؛ تێ تەخمینکرن کو هەژمارا کوشتی و برینداران ژ یا کو تێ راگهاندن پر زێدەتر بە.

ل ئالیێ دن، سێنتكۆمێ ئەو نووچەیێن مەدیایا ئیرانێ و سوپایا پاسداران دەرەواندنە کو دگۆتن “هنەک فرۆکەیێن شەرێن ئامەریکایێ هاتنە خستن”. سێنتكۆمێ تەکەز کر کو ئەڤ نووچە دووری راستیێ نە، چ فرۆکەیێن وان زرار نەدیتنە و ئۆپەراسیۆنێن وان یێن ئاسمانی ب بریارداری بەردەوام دکن.