زەڤیا پارس یا باشوور یا گازێ ل ئیرانێ ھات بۆمبەبارانکرن
تەلەڤیزیۆنا فەرمی یا ئیرانێ راگھاند کو، زەڤیا گازێ یا پارس یا باشوور ل پەراڤێن کەنداڤێ کەتیە بەر ئێریشێن ب مووشەکان یێن ئامەریکا و ئیسرایلێ، و د ئەنجامێ دە شەواتەکە مەزن چێ بوویە. قەتەر ژی، کو د وێ زەڤیێ دە لگەل ئیرانێ ھەڤپارە، ئەو ئێریش وەکی “پێنگاڤەکا مەترسیدار و نەبەرپرسیارانە” وەسف کر.
جیگرێ پارێزگارێ بوشەھرێ ل باشوورێ ئیرانێ ئیحسان جەھانیان ئیرۆ رۆژا چارشەم، 18ێ ئادارا 2026ی، ژ بۆ مەدیایا وەلاتێ خوە راگھاند کو، ھندەک ژ دەزگەھێن گازێ یێن دەڤەرا ئابۆری یا ئەنەرژیێ یا پارسا باشوور ل عەسەلوویەیێ ب مووشەک و بەرماھیێن شەر ھاتنە بۆمبەبارانکرن. ئاماژە ژی دا کو، تیمێن ئاگرڤەمراندنێ بزاڤێ دکن کو وی ئاگری کۆنترۆل بکن.
د ڤێ ناڤبەرێ دە، قەتەر، کو زەڤیا گازێ یا ھەری مەزنا جیھانێ (پارسا باشوور/گازا باکور) لگەل ئیرانێ پارڤە دکە، ئەو ئێریش ب توندی شەرمەزار کر.
بەردەڤکێ وەزارەتا دەرڤەیا قەتەرێ ماجد ئەنساری ل سەر حەسابا خوە یا تۆرا جڤاکی یا Xێ نڤیساندیە: ئارمانجکرنا دەزگەھێن زەڤیا پارسا باشوور، کو درێژکرنا زەڤیا گازێ یا باکورێ قەتەرێیە، پێنگاڤەکا مەترسیدار و نەبەرپرسیارانەیە.
ئەنساری ھشیاری ژی دا کو، ئێریشێن ل سەر ژێرخانەیا ئەنەرژیێ گەفەکا راستەراستە ل سەر ئەولەھیا ئەنەرژیا جیھانێ و ژینگەھا دەڤەرێ، داخواز ژی کر کو دەزگەھێن خزمەتێ یێن گرینگ ژ پەڤچوونێن لەشکەری بێن دوورخستن.
زەڤیا پارسا باشوور نێزیکی 70%یا پێدڤیتیێن گازا ناڤخوەیی یا ئیرانێ دابین دکە و بەشەکا سەرەکی یا ئابۆریا وی وەلاتییە. ئیسرایلێ پێشتر ژی ل خزیرانا 2025 و د دەما شەرێ 12-رۆژی یێ د ناڤبەرا وان دە چەند دەزگەھێن گازا ئیرانێ ل وێ دەڤەرێ کربوون ئارمانج.
