سەرۆکێ دەولەتێن یەکبوویی یێن ئامەریکایێ دۆنالد ترامپ، پەیامەک توند و ھشیاریەک نوو ئاراستەیی سەرۆکاتیا نوویا ئیرانێ کر. ترامپ راگھاند کو رێبەرێ نوویێ ئیرانێ داخوازا ئاگربەستێ کریە، لێ وی شەرتەکی گران دانیە پێشیا تەھرانێ: ڤەکرنا بلەز و بێ شەرتا تەنگاڤا ھورمزێ.
دۆنالد ترامپ ئیرۆ چارشەمێ، 1ێ نیسانا 2026ێ، ل سەر پلاتفۆرما “تروس سۆسیال” داخویانیەک وەشاند و تێ دە ئەشکەرە کر کو رێبەرێ نوویێ ئیرانێ، موجتەبا خامەنەیی، داخوازا ئاگربەستێ ژ واشنگتۆنێ کریە. ترامپ د نرخاندنا خوە دە دیار کر کو خامەنەیی یێ کور ل گۆری سەرۆکێن بەرێ “زیرەکتر و نەرمتر” خویا دکە، لێ دەستنیشان کر کو ئەڤ یەک ھەلوەستا ئامەریکایێ یا ل سەر ئەولەھیا دەریایی ناگوھەرینە.
ترامپ د پەیاما خوە دە ب زمانەکی توند گەف خوار و گۆت: “ھەتا تەنگاڤا ھورمزێ ژ بۆ ھاتووچوونا ئازادا کەشتیان نەیێ ڤەکرن، ئێریشێن مە دێ بەردەوام بکن.” سەرۆکێ ئامەریکایێ ھشیاری دا کو ھەکە ئیران ڤێ داخوازێ جھ نەیینە، دێ وەلاتێ وان ب تەمامی وەرە وێرانکرن و “ڤەگەرە سەردەما کەڤرین.”
ئەڤ گەشەدان د دەمەکێ دە نە کو ھەرێم د ناڤ ئاگرەکی مەزن دەیە. د 28ێ سباتا 2026ێ دە، ھێزێن ئامەریکا و ئیسرایلێ ئۆپەراسیۆنەکە ھەڤبەشا بەرفرەھ ل دژی ئیرانێ پێک ئانیبوون. د ئەنجاما وان بۆمبەبارانان دە، رێبەرێ بلندێ ئیرانێ عەلی خامەنەیی و ھەژمارەک زێدەیا فەرماندارێن پلەبلند ھاتبوون کوشتن.
پشتی ڤێ دەربەیا گران، ئیرانێ ب مووشەک و درۆنان ئێریشی ئیسرایل و بارەگەھێن ئامەریکایێ یێن ل ھەرێمێ کر و د پێنگاڤەکە ستراتەژیک دە تەنگاڤا ھورمزێ ل روویێ بازرگانیا جیھانێ گرت، کو ئەڤ یەک بوو سەدەما کریزەکە مەزنا ئەنەرژیێ.
