ئەردۆگان ھشیاری دا: “ئەم ل بەرانبەری مەترسییا بەرفرەھبوونا جەنگێ نە”
سەرۆککۆمارێ ترکیەیێ رەجەب تەییب ئەردۆگان، ل سەر ئاسۆیا گەشەدانێن لەشکەری یێن ل رۆژھلاتا ناڤین ھشیاریێن توند دان و راگھاند کو ھەرێم لگەل مەترسیەکا راستەقینە یا بەرفرەھبوونا شەری رووبروویە. ئەردۆگان تەکەز کر کو ئەنقەرە ھەموو ھەولدانێن خوە دکە دا کو ترکیەیێ ژ “ئاگرێ ھەڤرکیان” دوور بخە.
ئەردۆگان د گۆتارەکێ دە ل پارلامەنتۆیا ترکیەیێ، بال کشاند سەر شەرێ ئامەریکا و ئیسرایلێ یێ ل دژی ئیرانێ کو دەرباسی مەھا خوەیا دویەم بوویە. سەرۆککۆمارێ ترکیەیێ گۆت: “ئەم ل بەرانبەری مەترسیەکا راستەقینە یا درێژبوون و بەرفرەھبوونا جەنگێ نە. ئەرکا مەیا سەرەکی پاراستنا وەلاتێ مەیە و ئەم جددی نە کو ترکیەیێ ب کێمترین زرار ژ ڤێ قۆناغا کریتیک دەرباس بکن.”
سەرۆککۆمارێ ترکیەیێ ئاماژە ب وێ یەکێ کر کو ئەنقەرەیێ ترافیکا خوەیا دیپلۆماسی ب واشنگتۆن، تەھران و پایتەختێن دنێن ھەرێمێ رە زێدە کریە. ئەردۆگان دەستنیشان کر کو هێژان دەرفەت ژ بۆ ڤەژاندنا رێیێن دیپلۆماسیێ ھەیە و گۆت: “ئەم د پەیوەندیەکە بەردەوام دە نە ژ بۆ رێگرتنا ل رووبرووبوونەکە لەشکەری یا تەڤگر کو دکارە ببە سەدەما کارەساتەکە مەزنتر.”
ئەڤ داخویانیێن ئەردۆگان د دەمەکێ دە نە کو ئالۆزیا ل ھەرێمێ گھیشتیە لووتکەیێ. پشتی ئێریشا بەرفرەھا ئامەریکا و ئیسرایلێ یا د 28ێ سباتا 2026ێ دە، کو تێ دە رێبەرێ بلندێ ئیرانێ عەلی خامەنەیی و سەرکردەیێن پایەبلند ھاتن کوشتن، شەر ب رەنگەکی بێسەرووبەر بەلاڤ بوویە.
رێبەرێ نوویێ ئیرانێ موجتەبا خامەنەیی، وەکی بەرسڤ تەنگاڤا ھورمزێ ل روویێ بازرگانیا جیھانێ گرتیە و ئێریشێن مووشەکی ئاراستەیی بنگەھێن ئامەریکایێ کریە. سەرۆکێ ئامەریکایێ دۆنالد ترامپ ژی ھشیاریەکە داوی دایە تەھرانێ کو ھەتا تەنگاڤ نەیێ ڤەکرن، دێ ئێریشێن “وێرانکەر” بەردەوام بن.
