تێچوویێ ئۆپەراسیۆنێن لەشکەری یێن ئامەریکایێ د شەرێ ئیرانێ دە هاتن ئاشکەرەکرن

مالپەرا “Iran War Cost Tracker” کو چاڤدێریا تێچوونێن دارایی یێن ئۆپەراسیۆنێن لەشکەری یێن ئامەریکایێ ل ئیرانێ دکە، راگهاند کو خه‌رجیێن ڤی شەری د ناڤا 37 رۆژێن بۆری دە 42 ملیار دۆلار دەرباس کرنە.

ل گۆری دانەیێن نوو یێن مالپەرێ، هەتا دوهـ 5ێ نیسانێ تێچوونا گشتی یا شەر گهشتیە زێدەتری 42.1 ملیار دۆلاران. هات دیارکرن کو ئەڤ تەخمین ل سەر بنگەها ئاگاهیێن کو وەزارەتا پاراستنێ یا ئامەریکایێ (پەنتاگۆن) د 10ێ ئادارێ دە پێشکێشی کۆنگرەێسا ئامەریکایێ کربوون، هاتنە ئامادە کرن.

رۆژانە میلیارەک دۆلار تێ خەرجکرن

د راپۆرێ دە هات ئاشکەرەکرن کو تەنێ د 6 رۆژێن یەکەمێن ئۆپەراسیۆنێ دە، پەنتاگۆنێ 11.3 میلیار دۆلار خەرج کرنە. هەر وها وەزارەتا به‌رگریێ یا ئامەریکایێ ئامادەکاری کریە کو د قۆناغێن بێ دە، ژ بۆ بەردەوامیا ئۆپەراسیۆنێن لەشکەری رۆژانە ملیارەک دۆلار وەرە خەرجکرن.

ئۆپەراسیۆنا لەشکەری یا هەڤبەشا ئامەریکا و ئیسرائیلێ یا ل دژی ئیرانێ، د 28ێ سباتا بۆری دە دەست پێ کر و تەڤی هەموو هەولدانێن دیپلۆماتیک، ئێرش و پەڤچوون هەتا نها ژی ب توندی بەردەوام دکن.