مالپەرا ینەت: رێکەفتنا ناڤبەرا ئامەریکا و ئیرانێ، ئیسرایل و حزبولاھێ ژی ل خوە دگرە

پشتی راگھاندنا ئاگربەستا دو ھەفتەیان یا د ناڤبەرا ئامەریکا و ئیرانێ دە، ئیسرایلێ مەرجێن خوە ئەشکەرە کرن. د ھەمان دەمێ دە ھات راگھاندنا کو رۆژا ئینێ دانوستاندنێن فەرمی ل ئیسلامابادێ دەست پێ دکن.

نڤیسگەھا سەرۆکوەزیرێ ئیسرایلێ ب داخویانیەکێ راگھاند، ئەو پشتگریێ ددن بریارا سەرۆکێ ئامەریکایێ دۆنالد ترامپ یا ژ بۆ سەکناندنا ئێرشێن ل سەر ئیرانێ بۆ ھەیاما دو ھەفتەیان. لێ بەلێ ئیسرایلێ ژ بۆ بەردەوامیا ڤێ ئاگربەستێ دو مەرجێن سەرەکی دانین:

1- دڤێت ئیران ب ئاوایەکی یەکسەر رێیێن دەریایی و تەنگاڤێن ناڤدەولەتی ڤەکە.

2- دڤێت ھەموو جورە ئێرشێن ل سەر ئامەریکا، ئیسرایل و وەلاتێن ناڤچەیێ دەملدەست وەرن راوەستاندن.

لبنان د ناڤ ئاگربەستێ دەیە یان نە؟

ل گۆری مالپەرا ئیسرایلی “ینەت”، ئاگربەستا کو ترامپ راگھاندیە، شەرێ ناڤبەرا ئیسرایل و حزبوللاھا لبنانێ ژی ل خوە دگرە. مالپەرێ گۆت، ل گۆری رێکەفتنێ، دێ ھەر دو ئالی ل لبنانێ ئێرشێن خوە راوەستینن و د بەردێلا وێ دە ئیران تەنگاڤا ھورمزێ ڤەکە.

لێ بەلێ، نڤیسگەھا سەرۆکوەزیرێ ئیسرایلێ د داخویانیا خوە دە خالەکا گرنگ رۆنی کر و دیار کر، ئەڤ سەکناندنا ئێرشان تەنێ پەیوەندیا وێ ب ئیرانێ رە ھەیە و لبنانێ ل خوە ناگرە.

جڤینا ل ئیسلامابادێ

ژ ئالیێ دن ڤە، ئەنجوومەنا بلندا ئەولەھیا نەتەوەیی یا ئیرانێ راگھاند، تیمێن وان رۆژا ئینێ، 10ی نیسانا 2026ێ، ل ئیسلامابادا پایتەختا پاکیستانێ ب نوونەرێن ئامەریکایێ رە روودنن. تەھرانێ دیار کر، ئارمانجا وان ئەوە کو د ناڤا ڤان ھەر دو ھەفتەیان دە بگھیژن رێکەفتنەکە داوی و ئاگربەستەکە ماییندە جیبجی بکن.

ئارمانجا ئامەریکا و ئیسرایلێ یا ھەڤبەش

نڤیسگەھا سەرۆکوەزیرێ ئیسرایلێ تەکەز کر، ئەو لگەل ئامەریکایێ ھەڤنێرینن دا کو رێ ل بەر مەترسیا ئەتۆمی، مووشەکی و پشتگریا ئیرانێ یا ژ بۆ تەرۆرێ وەرە گرتن. ھات راگھاندن، ئامەریکایێ سۆزا پاراستنا بەرژەوەندیێن ئیسرایل و ھەڤپەیمانێن خوەیێن عەرەب د دانووستاندنێن لگەل ئیرانێ دایە.